საბერძნეთის საფეხბურთო ჩემპიონატში მორიგი სკანდალური ფაქტი დაფიქსირდა. სალონიკის „პაოკისა“ და ათენის „აეკის“ შეხვედრა „პაოკის“ პრეზიდენტმა ივან სავიდისმა ჩაშალა, რომელიც მინდორზე იარაღით შეიჭრა. სავიდისი მსაჯს მოკვლით ემუქრებოდა, თუკი ის გატანილ გოლს არ ჩათვლიდა.

საქმე იმაშია, რომ თამაშის მიწურულს, როდესაც ანგარიში 0:0 იყო, „პაოკის“ ფეხბურთელმა გოლი გაიტანა, მსაჯმა კი თამაშგარე დააფიქსირა და ბუნებრივია, გოლი არ ჩაითვალა.

გავრცელდა ფოტო, სადაც ჩანდა, რომ „პაოკის“ პრეზიდენტი მოედანზე იარაღით იყო შესული.

სპეცრაზმის დახმარებით სამსაჯო ბრიგადამ გასახდელს შეაფარა თავი, მატჩი შეწყდა და ჯერჯერობით უცნობია როდის გაგრძელდება.

ცნობისთვის, ივან სავიდისს ქართული ფესვები აქვს - 1959 წლის 27 მარტს წალკაში დაიბადა.