ბაჩო ახალაიასთან ერთად სასამართლომ გამამართლებელი განაჩემი გამოიტანა გიგი კალანდაძის მიმართ. რაც შეეხება ვიცეპოლკოვნიკ ზურაბ შამათავას და კიდევ ერთ ბრალდებულს ალექსანდრე გორგაძეს, მათ სასჯელის მუხლი შეეცვალათ და 140-დღიანი საზოგადოებისთვის სასარგებლო შრომა შეეფარდათ, თუმცა ამნისტიის შესახებ კანონის თანახმად, ეს სასჯელიც მოეხსნათ.

გამამართლებელ განაჩენს ოვაციით შეხვდნენ სხდომათა დარბაზში შეკრებილი ბაჩო ახალაიას ოჯახის წევრები და მხარდამჭერები. თავად ბაჩო ახალაია, განაჩენის გამოცხადების შემდეგ ბადრაგმა სასამართლო დარბაზიდან გაიყვანა.

ჯერჯერობით უცნობია ბრალდების მხარის პოზიცია, კერძოდ ის, გაასაჩივრებს თუ არა ბრალდება მოსამართლე გიორგი დარახველიძის გადაწყვეტილებას.

სასამართლოს გადაწყვეტილებასთან დაკავშირებით კომენტარი უკვე გააკეთა ბაჩო ახალაიას მამამ, ზუგდიდის მაჟორიტარმა დეპუტატმა როლანდ ახალაიამ:

"მე როგორც პროფესიონალი, როცა ვესწრებოდი სასამართლო სხდომებს, ვხედავდი, რომ არაფერი არ იყო, საქმე შეთითხნილი იყო და აქედან გამომდინარე, ველოდი ასეთ გადაწყვეტილებას. მართლმსაჯულებამ თავის ისტორიაში უმნიშვნელოვანესი ნაბიჯი გადადგა", - განაცხადა პარლამენტის წევრმა.