მოსამართლემ გუშინდელი სხდომის ბოლოს დარბაზში შეკრებილებს ამცნო, რომ განაჩენი 1 აგვისტოს გამოცხადდებოდა.

ბაჩანა ახალაიას, გიგი კალანდაძეს, ზურაბ შამათავას და სხვა ბრალდებულებს გამოძიება თანამდებობრივი უფლებამოსილების გადამეტებას და თავისუფლების უკანონოდ აღკვეთას ედავება.

სასამართლო პროცესებზე, რომლებიც თვეებია, მიმდინარეობს, დაიკითხნენ როგორც ბრალდების, ასევე დაცვის მხარის მიერ წარმოდგენილი მოწმეებიც.

ბრალდების ბევრმა მოწმემ ჩვენება შეცვალა და განაცხადა, რომ პირველი ჩვენება იძულებით ან კარნახით დააწერინეს, ხოლო ზოგიერთი მოწმის სკანდალური დეტალები მედიით გამოქვეყნდა, ფოტოების თანხლებით, საიდანაც ირკვევა, რომ ბრალდების მოწმეები, ბაჩო ახალაიას წინააღმდეგ მიცემული ჩვენების შემდეგ, ოჯახთან ერთად თურქეთში, ხუთვარსკვლავიან სასტუმროებში იმყოფებოდნენ.

იყო კურიოზული სიტუაციებიც: მაგალითად, ბრალდების მოწმეს, რომელსაც არ ახსოვდა ცალკეულ თანამდებობის პირთა გვარები, რომლებიც თითქოსდა მისი ხელმძღვანელები იყვნენ, მათი ვინაობა, ასევე ბრალდების ცალკეული ეპიზოდების მინიშნებები, ხელისგულზე ჰქონდა ჩამოწერილი, რაც ბრალდებულთა ადვოკატმა შეამჩნია.

აღსანიშნავია, რომ სასამართლომ გირაოს სანაცვლოდ წინასწარი პატიმრობიდან გაათავისუფლა ბაჩო ახალაიასთან ერთად ბრალდებული ორი პირი, მაშინ როცა ბრალდების მხარე გირაოთი წინასწარი პატიმრობის შეცვლის წინააღმდეგი იყო.