ინტერვიუ რუსეთსა და უკრაინაში პატრიარქის ვიზიტამდეა ჩაწერილი. ეხება რა საქართველო-რუსეთის ურთიერთობებს, საქართველოს პატრიარქი აცხადებს, რომ სირთულეები ხელოვნურადაა შექმნილი და გამოსავალი უნდა მოინახოს, ხოლო ჩიხური სიტუაციიდან გამოსავლის ძიებაში პასუხისმგებელ პირებად რუსეთის პრეზიდენტსა და საქართველოს პრემიერმინისტრს ასახელებს:

" ჩვენ ძმები ვიყავით და ძმებად დავრჩებით. ოღონდ, მთავარია, ერთმანეთთან გულწრფელები ვიყოთ. მაგალითად, ცოტა ხნის წინ 300 მეტრით გადმოსწიეს საზღვარი. ეს რუსეთისთვის არაფერს ნიშნავს, საქართველოსთვის კი ძალიან ბევრია.

ის დაძაბული ურთიერთობა, რომელიც საქართველოსა და რუსეთს შორის წარმოიშვა, ხელოვნურად შექმნილი დაძაბულობაა. ქვეყნებს შორის ყველანაირი სირთულის არსებობის მიუხედავად, ჩვენმა ეკლესიებმა შეინარჩუნეს ძმური ურთიერთობები.

ჩვენმა ხალხმაც, ორივე მხრიდან, ეს ურთიერთობები შეინარჩუნა. მე მინდა ვთქვა, რომ ეს არ შეიძლება, დიდხანს გაგრძელდეს - რუსეთშიც, საქართველოშიც, არიან კეთილისმსურველი ძალები, რომლებიც ამ სიტუაციის გამოსწორებას შეძლებენ და მე ვფიქრობ, რომ აფხაზეთიც და ცხინვალიც საქართველოს შემადგენლობაში იქნება", - ამბობს საქართველოს პატრიარქი რუსულ გამოცემასთან საუბარში.