საქართველოს იუსტიციის სამინისტროს კომპიუტერულ ინციდენტებზე დახმარების ჯგუფი „ფეისბუკზე“ აშშ-ში მომხდარ ფაქტზე წერს:

ტეილორ ჰადლსტონს (Taylor Huddleston) არკანზასის შტატიდან მავნე პროგრამის შექმნისა და მისი გაყიდვისთვის 3 წლიანი პატიმრობა მიესაჯა.

პროგრამა - „NanoCore RAT“ თავდაპირველად იმ მიზნით შექმნა, რომ სკოლებს მოსწავლეების, ხოლო მშობლებს თავიანთი შვილების ინტერნეტ სივრცეში აქტივობის კონტროლი შეძლებოდათ, თუმცა მოგვიანებით პროგრამის შემქმნელმა მისი გაყიდვა ე.წ. „Underground“ ჰაკერულ ფორუმებზე 25 აშშ დოლარად დაიწყო.

„NanoCore RAT“-ი მყისიერად იქცა ჰაკერების მთავარ იარაღად და მსოფლიოს მასშტაბით აქტიურად გამოიყენებოდა სხვადასხვა კიბერშეტევის დროს.

ჰადლსტონმა სასამართლოს წინაშე დეტალურად აღწერა, თუ რა შესაძლებლობები ჰქონდა მავნე პროგრამას:

- კომპიუტერიდან სენსიტიური ინფორმაციის მოპარვა;
- მსხვერპლების კომპიუტერების დისტანციურად კონტროლი (ვებკამერის ჩართვა, კლავიატურის მონიტორინგი და ა.შ.);
- ფაილების შიფრაცია გამოსასყიდის მოთხოვნის მიზნით (ransomware);
- ინფიცირებული კომპიუტერის DDos-ის ქსელში ჩართვა.

ტეილორმა სასამართლოს წინაშე აღიარა, რომ მავნე პროგრამა თავიდანვე კიბერკრიმინალებისთვის შექმნა და რომ მისთვის ცნობილი იყო პროგრამის მავნე მიზნებით გამოყენების შესაძლებლობის შესახებ.