ტელეკომპანია იმედის ჟურნალისტი, დავით ცაგარელი ტელეეკრანებზე და პირდაპირ ჩართვებში ერთი კვირის განმავლობაში სათვალით გამოდიოდა.

28 წლის ჟურნალისტის "ექსპერიმენტი" მას შემდეგ დაიწყო, რაც მან გაიგო, რომ მის 9 წლის შვილს, ნიკოლოზს, კლასელები სათვალის ტარების გამო დასცინოდნენ.

"კაცები ზრუნავენ" დავით ცაგარელის "ექსპერიმენტზე" წერს.

"პარასკევს თვალის ექიმთან მივედით. თითქმის 2-საათიანი ლოდინის შემდეგ ექიმმა მიგვიღო. გვითხრა, რომ ნიკუშას თვალის მხოლოდ 10% მუშაობს, მხედველობა კი +5-ია. სათვალე რამდენიმე წლის წინ ეკეთა და შედეგიც საკმაოდ კარგი გვქონდა, ამიტომ მეგონა რომ ამ ამბავს ჩემი შვილის მხრიდან განსაკუთრებული ნერვიულობა არ მოჰყვებოდა. თუმცა შევცდი. ცრემლიანი თვალებით ამომხედა და მითხრა: “შენ არ იცი რამდენად რთულია?!” ამ ამბავმა ძალიან შემძრა და გადავწყვიტე გამეგო - მართლაც რომ რამდენად?!

მეორე დღეს მინიმუმ 50 ადამიანს შევხვდი. მათგან 49-ის რეაქციამ ძალიან გამაოცა, რადგან ზოგს ეგონა, რომ ახალი იმიჯი მქონდა - ზოგმა ამ ”სიმახინჯის მოშორება” მირჩია, ზოგმა კი უბრალოდ გულიანად გადაიხარხარა. მხოლოდ ერთმა მითხრა რომ მიხდება. არ მოგატყუებთ და დღის ბოლოს გარკვეული დისკომფორტი და კომპლექსი მქონდა. სწორედ, ამ დროს წარმოვიდგინე რამდენად რთულია 9 წლის ბავშვისთვის ამასთან გამკლავება. ამიტომ მისი მხარდაჭერა გადავწყვიტე. სათვალეს უკვე რამდენიმე დღეა არ ვიხსნი, არც ჩართვაზე რამაც ჩემს შვილს დიდი სტიმული მისცა და ახლა საწყენ სიტყვებს ყურადღებას თითქმის აღარ აქცევს!"