"1 ივლისიდან დაიწყო საყოველთაო დაზღვევის მეორე ეტაპი, რომელიც ითვალისწინებს საბაზისო სადაზღვევო პაკეტის გაზრდას და მოიცავს დაახლოებით 2 მილიონ ადამიანს, რომლებიც ან საერთოდ არ იყვნენ დაზღვეულები ან სარგებლობდნენ პირველი ეტაპით (28 თებერვლამდე).

საზოგადოებრივი კავშირი "დროა" მიესალმება მმართველი პოლიტიკური ძალის დაწყებულ რეფორმას ჯანდაცვის სისტემაში და მიიჩნევს, რომ საკუთარი მოსახლეობის ჯანმრთელობაზე ზრუნვა არის სახელმწიფოს ერთ-ერთი მთავარი მოვალეობა. ჩვენი ორგანიზაცია მოხარულია, რომ საქართველო შეუერთდა იმ ქვეყანათა რიცხვს სადაც საყოველთაო დაზღვევა მოქმედებს, ვინაიდან ეს მოდელი დანერგილია თითქმის ყველა წამყვან ევროპულ ქვეყანაში და მიგვაჩნა, რომ ეს იქნება კიდევ ერთი წინ გადადგმული ნაბიჯი ევროინტეგრაციისკენ," - ნათქვამია "დროას" მიერ გავრცელებულ განცხადებაში.

ამავდროულად, "დროა" მოუწოდებს ჯანდაცვის სამინისტროს, მიიღოს მსოფლიო ჯანდაცვის ორგანიზაციის რეკომენდაციები და რეფორმის განხორციელების დროს ბრმად არ იქნას გადმოღებული მსოფლიოში არსებული მოდელები, გათვალისწინებული იქნეს ქვეყნის სოციალურ-ეკონომიკური, დემოგრაფიული და ეროვნული თავისებურებები.

ორგანიზაციას მიაჩნია, რომ რეფორმის საწყის ეტაპზე გამოიკვეთა რამოდენიმე პრობლემა, რომლის სასწრაფო გადაწყვეტა აუცილებელია რეფორმების წარმატებულად დასრულებისათვის.

"ესენია:

1. სამედიცინო პერსონალის მიზერული ანაზღაურება და მისი აბსოლუტურად უუფლებო მდგომარეობა. საშიშია მშიერი მონა ექიმი, რომელიც ფიქრობს მხოლოდ საკუთარი ოჯახის გამოკვებაზე და არა პაციენტის ჯანმრთელობაზე.

2. სამედიცინო მომსახურების ხარისხი.ეს პრობლემაც პირდაპირ კავშირშია სამედიცინო პერსონალთან და მისი გადაჭრის ვალდებულება უნდა აიღოს თავის თავზე სახელმწიფომ უწყვეტი სამედიცინო განათლების დანერგვით. დღევანდელმა ხელისუფლებამ არ უნდა გაიმეოროს წინა ხელისუფლების შეცდომა, რომელიც მოუწოდებდა ექიმებს ინტერნეტის საშუალებით გაეღრმავებინათ საკუთრი ცოდნა.

3.სახელმწიფომ უნდა უზრუნველყოს იმ მახინჯი სქემის ან გაუქმება ანდა რეგულაცია, რასაც ჰქვია სადაზღვეო კომპანიის, სამედიცინო დაწესებულების და სააფთიაქო ქსელის ერთი იურიდიული პირის საკუთრებაში არსებობა."

"დროა" მოუწოდებს შესაბამის ორგანოებს, გაითვალისწინონ საზოგადოებაში არსებული შენიშვნები და კვლავაც განახორციელებს პროცესის მიმდინარეობის მონიტორინგს.