მარტოხელა მოხუცების გაქურდვისთვის კატალონიელმა სამართალდამცავებმა 4 პირი, მათ შორის, ქართული წარმოშობის ქალი დააკავეს. ინფორმაციას ამის შესახებ ესპანური მედია ავრცელებს. გავრცელებული ინფორმაციით, დანაშაულებრივი ჯგუფის წევრები პოტენციურ მსხვერპლებს თავს გაზის კომპანიის წარმომადგენლებად აცნობდნენ, მათ ბინებში შეღწევას ახერხებდნენ და სახლიდან ძვირფასეულობასა და ფულს იპარავდნენ. ამ საქმისთვის ისეთ ადამიანებს ირჩევდნენ, რომელთაც ალცჰეიმერის ან პარკინსონის დაავადება ჰქონდათ.

კრიმინალურ დაჯგუფების წევრებს ფუნქციები გადანაწილებული ჰქონდათ - ქალი სატელეფონო ოპერატორის როლს ირგებდა და მსხვერპლთან კომუნიკაციას ამყარებდა. ერთი მამაკაცი მძღოლის ფუნქციას ითავსებდა, დანარჩენი ორი კი მარტოხელა მოხუცების ბინაში შედიოდა.