NASA-მ გამოუშვა დისკი, რომელზეც 1977 წელს კოსმოსში გაგზავნილი "დედამიწის ხმებია" ჩაწერილი

მსოფლიო - 15:55, 24 Feb, 2018

3445

23 თებერვალს, გამოვიდა ე.წ. "ვოიაჯერის ოქროს დისკი", რომელშიც ჩაწერილია 1977 NASA-ს მიერ კოსმოსურ ხომალდ "ვოიაჯერ 1"-სა და "ვოიაჯერ 2"-ის მეშვეობით მზის სიტემის მიღმა გაგზავნილი აუდიომასალა.

პროგრამა Voyager იყო ამერიკული სამეცნიერო პროგრამა, რომლის საფუძველზეც 1977 წელს NASA-მ კოსმოსში გაუშვა ორი იდენტური ავტომატური კოსმოსური ზონდი ვოიაჯერ 1 და ვოიაჯერ 2 მზის სისტემის მიღმა მდებარე სივრცის შესწავლის მიზნით.

2012 წლის 25 აგვისტოს „ვოიაჯერ 1“ ადამიანის მიერ შექმნილი პირველი მოწყობილობა გახდა, რომელიც მზის სისტემას გასცდა. რობოტები აღჭურვილნი არიან მრავალი სამეცნიერო ინსრუმენტით, ფოტო და რადიო დანადგარებით, ინფრაწითელი და ულტრაიისფერი სპექტომეტრებით და სხვა მრავალი მოწყობილობით. „ვოიაჯერების“ მიერ დედამიწაზე გამოგზავნილი ინფორმაციით ბევრი ახალი აღმოჩენა მოხდა და ნათელი მოეფინა ბევრ კითხვას.

ორივე ზონდზე მიმაგრებულია ოქროს ფირფიტა, რომელზეც ჩაწერილია დედამიწის სურათები, ვულკანის ამოფრქვევის, წვიმის, ელჭექის, გულისცემისა და სხვა ბუნებრივი მოვლენების ხმები. ასევე ხმები, რომელსაც დედამიწის ბინადარი ცხოველები გამოსცემენ. აქვე ჩაწერილია მისალმება 58 ენაზე, მათ შორის ლათინურ და არამეულ ენებზე. მრავალი ჟანრის მუსიკალური ნაწარმოებების კოლექცია და დედამიწის სხვადასხვა კულტურათა ხალხური სიმღერები — მათ შორის ქართული ხალხური სიმღერა „ჩაკრულო“. ფირფიტის მეორე მხარეს ამოტვიფრულია კოსმოსური რუკა დედამიწის მდებარეობის ზუსტი კოორდინატებით.