უკრაინის გენერალური პროკურორი იური ლუცენკო ადასტურებს, რომ უკრაინელ მილიარდერს იგორ კოლომეისკის ჰოლანდიაში, ამსტერდამში, შემთხვევით შეხვდა. ლუცენკო ამსტერდამში სამედიცინო მიზნებით იმყოფებოდა. მათი შეხვედრის სურათები ინტერნეტით გავრცელდა.

ჟურნალისტების დაინტერესება გამოიწვია იმ ფაქტმა, რომ ლუცენკო იმ ქვეყანაში იმყოფებოდა, სადაც ამჟამად მიხეილ სააკაშვილია.

"ამსტერდამში სამედცინო მიზნებით ვიყავი. ციხიდან გამოსვლის შემდეგ ყოველ წელს ვიტარებ მცირე ქირურგიულ ოპერაციას, ეს ჩემი უფლებაა, იქ ვიმკურნალო, სადაც ექიმები ჩათვლიან საჭიროდ," - აცხადებს ლუცენკო.

რაც შეეხება იგორ კოლომეისკის, ლუცენკოს განცხადებით, მის წინააღმდეგ არც გამოძიება მიმდინარეობს და არც საქმეა აღძრული.

"დიდი სიამოვნებით ვესაუბრე კოლომეისკის, იმ საკითხზე, რომ იგი მედია და ფინანსურ მხარდაჭერას უწევს იმათ, ვინც ქვეყნის საფუძვლებს ანგრევს. საუბარი იყო სააკაშვილისა და მისი გარემოცვის აქციებზე. მე მას ველაპარაკე როორც ტურისტი," - აცხადებს ლუცენკო.

რაც შეეხება კოლომეისკის მიერ სააკაშვილის დაფინანსებას, ლუცენკოს თქმით, ეს მის კომპეტენციაში არ შედის.

"კოლომეისკის შეუძლია ნებისმიერი პოლიტიკური პარტია ან მოძრაობა დააფინანსოს, ეს კანონს არ ეწინააღმდეგება. ეს მისი უფლებაა, ისევე როგორც მის კუთვნილ ტელევიზიაში გამოიყვანოს ის. თუმცა, როგორც მოქალაქეს ეს არასწორად მიმაჩნია," - აცხადებს ლუცენკო.