ორგანიზაცია „ადამიანი, კანონი, თავისუფლება“ დავით ჭაკუას ექსტრადიციის დაჩქარებას ითხოვს

საზოგადოება - 13:52, 29 Jul, 2013

771

"ადამიანი, კანონი, თავისუფლება" მიმართავს შსს-ს და გენერალურ პროკურატურას, რომ არ დაუშვან პატიმრების წამებაში და არაადამინურ მოპყრობაში ბრალდებულის, დავით ჭაკუას ქართული მართლმსაჯულებისდან თავის არიდება.

ორგანიზაცია "ადამიანი, კანონი, თავისუფლება" მოუწოდებს ყველა უფლებადაცვით ორგანიზაციას მხარი დაუჭირონ ინიციატივას და საჯაროდ გამოხატონ თავიანთი პოზიცია.

,,ჩვენ, მოვითხოვთ დავით ჭაკუა ექსტრადირებულ იქნეს საქართველოში, წარსდგეს ქართული სასამართლოს წინაშე და პასუხი აგოს ყველა იმ დანაშაულზე, რომელიც ხდებოდა მისი თანამდებობაზე ყოფნის დროს. უამრავი პატიმარი ბრალს დებს მას წამებაში და არაადამიანურ მოპყრობაში. ქვეყნიდან მისი გაქცევა ისევ და ისევ ადასტურებს იმას, რომ იგი ფლობს გამოძიებისთვის უმნიშვნელოვანეს ინფორმაციას, რომელიც დაეხმარება ქართულ სასამართლოს სამართლიანი გადაწყვეტილების მიღებაში.

აქედან გამომდინარე, მივმართავთ შსს-ს და გენერალურ პროკურატურას მაქსიმალურად დაჩქარებულ ვადებში მოადგინონ დავით ჭაკუას ექსტრადირება.

გიორგი ჭულუხაძე (ორგანიზაციის თავმჯდომარე): "რამოდენიმე დღის წინ დავით ჭაკუას ადვოკატის, მალხაზ ველიჯანაშვილის განცხადებით, ჭაკუას გადაწყვეტილი აქვს, მართლმსაჯულების წინაშე წარსდგეს, რათა საკუთარი სიმართლე დაამტკიცოს. ბატონი ველიჟანაშვილის განცხადებით, გამომდინარე იქედან, რომ ბრალდებული ჭაკუა არ ენდობა ქართულ მართლმსაჯულებას, იგი ვენაში ჩაბარდა სამართალდამცველებს.

ეს არაადექვატური განცხადება იმ პირის მხრიდან, რომელიც ბრალდებულია საქართველოს სისხლის სამართლის კოდექსის 332-ე მუხლის მე-3 ნაწილის "ბ" და "გ", 25-1443 მუხლის მე-2 ნაწილის "ა", "ბ", "დ", "ე", "ზ" და "თ" ქვეპუნქტებით, 25-145-ე, 25-3691-ე, 372-ე მუხლის მე-2 ნაწილით, 333-ე მუხლის მე-3 ნაწილის "ბ", "გ" ქვეპუნქტებითა და 1443 მუხლის მე-2 ნაწილის "ა", "ბ", "დ", "ე" და "ზ" ქვეპუნქტებით, არ აქვს მორალური და ზნეობრივი უფლება (თუ ასეთი საერთოდ გააჩნია) გააკეთოს მსგავსი განცხადება".

არასამთავრობო ორგანიზაცია "ადამიანი, კანონი, თავისუფლება" ბრალდებულის, დავით ჭაკუას ექსტრადიციასთან დაკავშირებით, გაავრცელებს პეტიციას სხვა უფლებადამცველ ორგანიზაციებთან, რათა ხელმოწერით დაადასტურონ მხარდაჭერა, რომელიც გადაეგზავნება შსს-ს და გენერალურ პროკურატურას", - ნათქვამია ორგანიზაციის განცხადებაში.