თურქეთი სირიაში - ერდოღანი ინტენსიური სამხედრო ოპერაციით იმუქრება

მსოფლიო - 12:21, 21 Feb, 2018

2420

თურქეთის პრეზიდენტი რეჯეპ ტაიპ ერდოღანი სირიის სამთავრობო ძალების აფრინის რაიონში შესვლის მცდელობას გამოეხმაურა. მისი თქმით აფრინის მიმართულებით პროსამთავრობო ძალების გადაადგილება თურქულმა არტილერიამ აღკვეთა და ინციდენტი ამოწურულია.

თურქეთის ლიდერის თქმით, მან ორშაბათს აღნიშნული საკითხი რუსეთის და ირანის პრეზიდენტებთან განიხილა და მხარეებმა შეთანხმებას მიაღწიეს.

რეჯეფ ტაიპ ერდოღანის თქმით, სირიის ჩრდილოეთში მიმდინარე სამხედრო ოპერაცია უფრო ინტენსიურად წარიმართება.

„დავბლოკავთ ყველა უცხოურ დახმარებას. ჩვენ ვაჩვენებთ ყველას, ვისაც თურქეთის სამხრეთ საზღვრებთან ტერორისტული დერეფნის შექმნა სურს, რომ ეს არ არის მარტივი ამოცანა“, – აღნიშნა ერდოღანმა.

სირიის ჩრდილოეთით თურქეთის სამხედრო ოპერაციის დაწყებიდან ერთი თვე გავიდა. თურქეთის ხელისუფლების განცხადებით ოპერაციის მიზანი სამხრეთ საზღვრებთან ტერორისტული საფრთხის განეიტრალებაა. თურქეთი სირიელი ქურთების ჯგუფებს ტერორისტულ ორგანიზაციებად განიხილავს. აქამდე სირიის ხელისუფლება თურქეთის არმიასა და ქურთულ სამხედრო ჯგუფებს შორის დაპირისპირებაში არ ჩარეულა. თუმცა ოპერაცია „ზეთისხილის რტოს“ დაწყებიდან ერთი თვის თავზე გავრცელდა ინფორმაცია, რომ სირიის სახელისუფლებო ჯარებმა აფრინში შესვლა დაიწყეს.

ქურთთა მთავარი გასამხედროებული დანაყოფის განცხადებით, მთავრობის მომხრე ძალები ჩრდილოეთში მდებარე აფრინის ანკლავში თურქეთის ძალებისგან საზღვრის დაცვის მიზნით შევიდნენ. განცხადების თანახმად, "ისინი განთავსდებიან საზღვრისპირა პოზიციებზე და მონაწილეობას მიიღებენ სირიის ტერიტორიული მთლიანობის დაცვაში" თურქეთის სახელმწიფო საინფორმაციო სააგენტო "ანადოლუ" იუწყება, რომ სირიის მთავრობის მომხრე ძალებმა უკან დაიხიეს მას შემდეგ, რაც თურქეთის არტილერიამ "გამაფრთხილებელი ცეცხლი გახსნა" მათი მიმართულებით.