დედამ არ იცოდა, როგორ ეთქვა შვილებისთვის კიბო რომ ჰქონდა და მათ წიგნი დაუწერა (ფოტოები)

ეს საინტერესოა - 11:22, 20 Feb, 2018

2729

34 წლის ბრიტანელ სარა უესტს , 2017 წლის თებერვალში, ექიმებმა მკერდის სიმსივნე დაუდგინეს. მაგრამ ყველაზე რთული მოსასმენი ჯერ კიდევ წინ ჰქონდა. ორ კვირაში ექიმებმა საბოლოო დიაგნოზი დასვეს. სარას მეოთხე სტადიის სიმსივნე ჰქონდა. მეტასტაზები კი გავრცელებული იყო ძვლებშიც, ფილტვებშიც და ტვინშიც.

დედისთვის ყველაზე რთული ამ ამბის მისი ქალიშვილებისთვის გამხელა აღმოჩნდა.

სარამ არ იცოდა, როგორ ეთქვა მისი 3 და 6 წლის ქალიშვილებისთვის, რომ სასიკვდილო დაავადება ჰქონდა.

ბევრი ფიქრის შემდეგ სარამ გამოსავალი იპოვა. მან წიგნი დაწერა სახელწოდებით „Mummy's got a poorly“, რომელშიც ქიმიოთერაპიზე, თმის ცვენაზე და ყველა იმ მიზეზზეა საუბარი, რატომ არ შეუძლია დედას საძინებლიდან გამოსვლა და ძველებური რიტმით ცხოვრება.

„გოგონები იმდენად პატარები იყვნენ, რომ ამ ყველაფრის სათქმელად შესაფერის გზას ვეძებდი. ვეძებდი წიგნებშიც, თუმცა მათი ასაკობრივი კატეგორიისთვის ვერაფერი ვიპოვე, ყველაფერი ისე რთულად ეწერა, ისეთი ტერმინებით.

როდესაც მეოთხე სტადიის შესახებ შევიტყვე, გონება გამეთიშა. შემდეგ კი, პირველი რაზეც გავიფიქრე, როგორ ვუთხრა ეს ჩემს შვილებს“ - ამბობს სარა.

სარამ მკურნალობა და წიგნზე მუშაობა დაიწყო. წიგნისთვის სურათები კი უფროს ქალიშვილთან ოლივიასთან ერთად დახატა. როდესაც წიგნი მზად იყო, მეგობარი დაეხმარა და 2 000 ეგზემპლიარი დაბეჭდა.

ორი შვილის დედამ აღმოაჩინა, რომ წიგნზე მუშაობის პროცესი მას და მის ოჯახს ავადმყოფობაზე საუბარში დაეხმარა.

„ამელია ჯერაც ძალიან პატარაა და უბრალოდ ამბობს, რომ დედამ წამლები უნდა მიიღოს, რადგან მას სტკივა. ოლივია კი სიკვდილზე ბევრს მეკითხება, თითქოს მოულოდნელად გაიზარდა“ - ამბობს სარა.

სარას თქმით, გვერდში უდგას მისი პარტნიორი და ყველანაირად ცდილობენ, ბავშვებს ძველებური ცხოვრება ჰქონდეთ.

„მაგრამ მე ვგრძნოვ, მათ თითქოს ბავშვობა მოპარეს“ - ამბობს კიბოსთან მებრძოლი დედა.

სარას არასოდეს უკითხავს ექიმებისთვის, რამდენი დრო დარჩა. მისი თქმით, უნდა ოჯახთან ბედნიერი დრო გაატაროს და არ ორიენტირდეს იმაზე, რომ მალე მათ დატოვებს.