"პრაიმტაიმის" ცნობით, "რუსთავი2"-ს მალე ბიძინა ივანიშვილთან დაახლოებული პირები შეისყიდიან. გამოცემა იუწყება, რომ ახლანდელი 90%-ის მფლობელებმა, ძმებმა ყარამანიშვილებმა უკვე მიიღეს გადაწყვეტილება თავიანთი წილის გაყიდვის შესახებ. ივანიშვილის წარმომადგენლები "კავკასუს ონლაინითაც" არიან დაინტერესებულები და იმ მედიასაშუალებებითაც (ძირითადად, ინტერნეტგამოცემებით), რომლებიც ამ კომპანიას უკავშირდებოდა ან უკავშირდება.

"პრაიმტაიმის" ცნობით, მოლაპარაკება უკვე დასრულდა "ევრიკასთან", რომელსაც ფრიდონ ინჯია ფლობს. ამ კომპანიამ გაწყვიტა ხელშეკრულება საპატრიარქოს ტელევიზიასთან და ლიცენზია "მაესტროს" გადასცა. ეს უკანასკნელი მალე ახალ დაფინანსებასაც მიიღებს და სავარაუდოდ, "ევრიკას" ოფისშიც გადავა. ამავდროულად, გაზეთი წერს, რომ "მეცხრე არხს" ბიძინა ივანიშვილმა დამატებით 20 მილიონი ლარი გამოუყო.