Reuters: აშშ-ისა და კოალიციის ავიაიერიში სირიაში - დაღუპული და დაჭრილია 300 რუსი მებრძოლი

მსოფლიო - 13:24, 16 Feb, 2018

9132

სირიაში, აშშ-ის ხელმძღვანელობით მოქმედი საერთაშორისო კოალიციის მიერ განხორციელებულ ავიადარტყმაზე დამატებით დეტალები ხდება ცნობილი.

როგორც Reuters-ი სამ წყაროზე დაყრდნობით იტყობინება, გასულ კვირას, დასავლური კოალიციის ავიაიერიშების შედეგად, კრემლთან დაკავშირებული კერძო სამხედრო კომპანიის დაახლოებით 300 კონტრაქტორი დაშავდა ან დაიღუპა .

რუსი სამხედრო ექიმის (ვინაობა გასაიდუმლოებულია) განცხადებით, გარდაცვლილია 100 , ხოლო დაშავებულია 200 ადამიანი. სხვა წყარომაც, რომელიც რუს მებრძოლებთან არის კავშირში, სააგენტოსთან დაადასტურა, რომ მსხვერპლი 80-ს აღემატება.

„როიტერსი“ აღნიშნავს, რომ ამ ადამიანების გარდაცვალების დრო ემთხვევა, 7 თებერვლას, სირიის ქალაქ დეირ-ეზ-ზორთან განვითარებულ მოვლენებს , სადაც აშშ-ის ხელმძღვანელობით მოქმედმა საერთაშორისო კოალიციამ სირიის სამთავრობო ძალებზე საჰაერო დარტყმა განახორციელა.

მაშინვე გავრცელდა ინფორმაცია, რომ აღნიშნული ავიაიერიშებით, რუსების დაჯგუფების ცოცხალი ძალის 80% , სამხედრო ტექნიკის კი 90% განადგურდა. თუმცა ოფიციალურმა მოსკოვმა ეს ინფორმაცია კატეგორიულად უარყო. რუსი ჩინოვნიკები აცხადებდნენ, რომ ავიადარტყმებს რუსეთის 5 მოქალაქე ემსხვერპლა, თუმცა მათ რუსეთის შეიარაღებულ ძალებთან კავშირი არ გააჩნიათ.

ექსპერტები აცხადებენ, რომ ამერიკელებმა საერთო ჯამში სირიის მთელს ტერიტორიაზე არსებული რუსული მოიერიშე ძალთა 20% გაანადგურეს

Reuters-ის შფასებით, ეს 2014 წლის შემდეგ, ეს ყველაზე დიდი სამხედრო დანაკარგია, რაც რუსეთმა ერთი ბრძოლით განიცადა. 2014 წელს უკრაინის აღმოსავლეთ ნაწილში ინტენსიური საბრძოლო მოქმედების დროს 100-ზე მეტი რუსი სამხედრო დაიღუპა. მოსკოვს არასოდეს დაუდასტურებია ეს დანაკარგი, რადგან უკარაინის ტერიტორიზე ჯარისკაცებისა და მოხალისეების გაგზავნას ოფიციალურად უარყოფს.

ამ კრახთან დაკავშირებითაც დუმს რუსული მედია და დუმან რუსეთის ოფიციალური პირები. როგორც ჩანს, ეს სახელმწიფო საიდუმლოა.