დიდი ბრიტანეთი რუსეთს კიბერშეტევის განხორციელებაში ოფიციალურად ადანაშაულებს

მსოფლიო - 12:55, 15 Feb, 2018

1750

დიდი ბრიტანეთის საგარეო საქმეთა სამინისტრომ ოფიციალურად დაადანაშაულა რუსეთის ოფიციალური სტრუქტურები 2017 წლის 27 ივნისს ვირუს-გამომძალველ NotPetya-ს (სხვა დასახელებები: Petya.A, Petya.D, ExPetya) მეშვეობით განხორციელებულ მასშტაბურ კიბერშეტევაში.

"დიდი ბრიტანეთის მთავრობას მიაჩნია, რომ რუსეთის ხელისუფლება, კერძოდ სამხედრო სტრუქტურები არიან პასუხისმგებლები 2017 წელის ივნისში NotPetya-ს მეშვეობით განხორციელებულ დამანგრეველ კიბერშეტევაზე. ეს შეტევა უკრაინის სუვერენიტეტისადმი განგრძობადი უპატივცემლობის ნათელი დადასტურებაა. ვირუსის გამოყენებამ ხელი შეუშალა სხვადასხვა ორგანიზაციების ნორმალურ მუშაობას ევროპის მთელს ტერიტორიაზე და მილიონობით ევროს ზარალი გამოიწვია," - აცხადებს გაერთიანებული სამეფოს საგარეო საქმეთა მინისტრის მოადგილე ლორდი ტარიკ აჰმადი.

საგარეო უწყებაში განმარტეს, რომ კიბერშეტევა შენიღბული იყო როგორც დანაშაულებრივი აქცია, მაგრამ მისი პირველადი ამოცანა უკრაინის საფინანსო, ენერგეტიკული და სახელმწიფო სექტორის დაზარალება იყო.

"ამ ფაქტის საჯარო გაცხადება ხაზს უსვამს იმ ფაქტს, რომ დიდი ბრიტანეთი და მისი მოკავშირეები აღარ მოითმენენ მსგავსი ხასიათის ბოროტგანზრახულ კიბერშეტევას," - აღნიშნავენ საგარეო სამინისტროში.

შეგახსენებთ, ანტივირუსული პროდუქტების კომპანია ESET-ის მონაცემებით, აღნიშნული კიბერშეტევის შედეგად, უკრაინის ტერიტორიაზე კომპიუტერების 15% დაზიანდა, მათ შორის, საბანკო ქსელი, მასმედია, სავაჭრო ორგანიზაციები, საფოსტო მომსახურება და სახელმწიფო დაწესებულებები.

აღსანიშნავია, რომ ანალოგიური ინფორმაცია 2018 წლის იანვარში The Washington Post-მაც გამოაქვეყნა. სტატიაში აღნიშნული იყო, რომ FBI-ის საიდუმლო მოხსენების მიხედვით, 2017 წლის 27 ივნისს ვირუსული შეტევა რუსეთის მთავარმა სადაზვერვო სამასახურმა (ГРУ) განახორციელა.