გრიპი, თუ რუსი მებრძოლების განადგურება სირიაში - პუტინმა ღონისძიებები გადადო და გენერლებს შეხვდა

მსოფლიო - 15:24, 14 Feb, 2018

7658

BBC-ის წყარო აცხადებს, რომ 13 თებერვალს, რუსეთის პრეზიდენტმა ვლადიმერ პუტინმა სამხედრო უწყებების ხელმძღვანელ გენერლებთან დახურული შეხვედრა გამართა. წყაროს ინფორმაციით, თათბირი სირიელ ქურთთა და აშშ-ს სამხედრო მრჩევლების ბანაკზე თავდასხმისას, ამერიკელების სამხედრო ავიაციის დარტყმის შედეგად რუს დაქირავებულთა ორი ბატალიონის განადგურების საკითხს შეეხო.

მას შემდეგ, რაც მსოფლიოში და რუსეთშიც გავრცელდა ინფორმაცია სირიაში, აშშ-ს სამხედრო ავიაციის მიერ დაჯგუფება "ვაგნერის" მებრძოლების განადგურების შესახებ, რუსეთის პრეზიდენტის სამუშაო გრაფიკი საგრძნობლად აირია.

ვლადიმერ პუტინმა 12-13 და 14 თებერვალს რამდენიმე დაგეგმილი ღონისძიება გადადო. 11 თებერვალს ცნობილი გახდა, რომ იგი აღარ ჩავა სოჭში, სადაც ორშაბათს რამდენიმე შეხვედრა, მათ შორის პალესტინის ლიდერთან, უნდა შემდგარიყო. მაჰმუდ აბასს პუტინი კრემლში შეხვდა. გადაიდო მისი ვიზიტი სტავროპოლსა და სავარაუდოდ, შორეულ აღმოსავლეთში. კრემლის პრესმდივნის, დიმიტრი პესკოვის განცხადებით, რუსეთის პრეზიდენტი ავადაა. მან აქვე აღნიშნა, რომ სხვა მხრივ პუტინი ჩვეულ დაძაბულ რეჟიმში მუშაობს.

წყარო აცხადებს, რომ ესეც უჩვეულოა - პრეზიდენტის ავადმყოფობის შესახებ ოფიციალურად არასდროს გაცხადებულა

როგორც ცნობილია, კრემლი ოფიციალურად არ აღიარებს სირიაში რუსი მებრძოლების დაღუპვას და აცხადებს, რომ სირიაში რუსეთის არმიის სახმელეთო ნაწილები არ არიან, ხოლო კერძო პირებზე მას ინფორმაცია არ აქვს.

სირიაში დარტიალებულ მოვლენებზე დუმს რუსული პრესა, ხოლო გრიგორი იავლინსკიმ, რუსეთის პრეზიდენტობის კანდიდატმა, პუტინს ოფიციალური ახსნა-განმარტების გაკეთება მოსთხოვა.