პუტინის პრესმდივანი სირიაში რუსი დაქირავებულების მასიური დაღუპვის თაობაზე გაურკეველი პასუხს სცემს

მსოფლიო - 18:46, 13 Feb, 2018

3680

რუსეთის პრეზიდენტის ვლადიმერ პუტინის პრეს-მდივანმა დიმიტრი პესკოვმა არც დაადასტურა და არც უარყო რუსი დაქირავებულების მასიური დაღუპვა სირიაში.

დაჯგუფება "ვაგნერის" 600 რუსი მებრძოლის დაღუპვასთან დაკავშირებით ჟურნალისტის მიერ დასმულ კითხვაზე მან განაცხადა, რომ ამის თაობაზე კითხვები თავდაცვის სამინისტროს უნდა დაუსვან.

"როგორც იცით, ჩვენ ვოპერირებთ მონაცემებით, რომელიც გაგვაჩნია რუსეთის ფედერაციის შეიარაღებული ძალების სამხედრო მოსამსახურეების შესახებ, რომლებიც სირიის არმიას უწევენ მხარდაჭერას. რუსეთის სხვა მოქალაქეების შესახებ ინფორმაციას, რომლებიც სირიაში იმყოფებიან, ჩვენ არ ვფლობთ," - განაცხადა პესკოვმა.

რუსეთის პრეზიდენტობის კანდიდატის გრიგორი იავლინსკის მოთხოვნასთან დაკავშირებით პესკოვი აცხადებს, რომ იავლინსკის არ შეიძლება ჰქონდეს ზუსტი მონაცემები სირიაში რუსეთის მოქალაქეების დაღუპვის თაობაზე.

"ჩვენ ვსაუბრობთ ინფორმაციაზე, რომელიც მედიაში გამოქვეყნდა. არ მგონია იავლინსკის ინფორმაციის უფრო სანდო წყარო გააჩნდეს. ამ შემთხვევაში ჩვენ მოგიწოდებთ, მედიის ინფორმაცია, როგორც პირველწყარო არ გამოიყენოთ. მოდით იმასაც გავუწიოთ ანგარიში, რომ მსოიფლიოს ბევრ ქვეყანაში ჩვენი თანამოქალაქეების დიდი რაოდენობაა და ამ მიმართულებით დეტალური ინფორმაციის ფლობა საკმაოდ ძნელია," - დაამატა მან.