აშშ-ში საერთაშორისო კიბერკრიმინალური დაჯგუფება გამოავლინეს

მსოფლიო - 17:47, 08 Feb, 2018

1358

აშშ-ის იუსტიციის სამინისტრომ გამოავლინა საერთაშორისო კიბერკრიმინალური დაჯგუფება Infraud Organization, რომელიც 2010 წლიდან არსებობს და მსოფლიოს სხვადასხვა ორგანიზაციას 530 მილიონი დოლარის ზარალი მიაყენა. მათ წინააღმდეგ სასამართლო პროცესი ნევადის შტატში გაიმართება, სადაც, პროკურატურის განცხადებით, იგი მორიგ ოპერაციას გეგმავდა, რომელიც 2,2 მილიარდი დოლარის ზარალს მოიტანდა.

დაჯგუფებაში 36 პირი იყო გაერთიანებული, რომელიც მსოფლიოს სხვადასხვა ქვეყნიდან იყვნენ. ჯგუფის დამფუძნებელი და ხელმძღვანელი იყო უკრაინელი სვიატოსლავ ბონდარენკო, რომელიც მას შემდეგ, რაც 2015 წელს ბონდარენკო უკვალოდ გაქრა, ჯგუფის თანადამფუძნებელმა რუსმა სერგეი მედვედევმა ჩაანაცვლა. ჯგუფის წევრები იყვნენ პაკისტანელი ამჯადა ალი ჩაუდარი, ბრიტანელი ენტონი ნნამდი ოკეაკპუ, ეგვიპტელი ოსამა აბდელჰამიდი, კოსოვოელი ბესარტ ჰოჯა, იტალიელი ჯენარო ფიორეტი, რუსი ანდრეი ნოვაკი. მოლდაველი ვალერიან კიოკიუ, კოტ-დივუარელი რამი ფავაზი და სხვ.

დღეისათვის დაკავებულია ჯგუფის 13 წევრი, წარმოშობით აშშ-დან, ავსტრალიიდან, ბრიტანეთიდან, საფრანგეთიდან და სერბეთიიდან.

გამოძიების თანახმად ჯგუფის "არსენალში" სხვადასხვა სახის კიბერდანაშაული იყო. ისინი ავტომატიზებული გაყიდვების სისტემით, ინტერნეტში ყიდნენ მოპარულ საკრედიტო ბარათების რეკვიზიტებს, მოპარულ საფინანსო და საბანკო ინფორმაციას, ვირუსულ და ჰაკერულ პროგრამებს. ასევე ისინი ამზადებდნენ ყალბ პირადობის მოწმობებს და საკრედიტო ბარათებს. აღსანიშნავია, რომ ჯგუფის შიდა ფორუმებზე დარეგისტრირებული იყო 10 901 ადამიანი. ჯგუფში ერთგვარი წესდება და შინაგანაწესი მოქმედებდა. მათ იერარქიაც გააჩნდათ - უმაღლესი იერარქები იყვნენ "ადმინისტრატორები", შემდეგ საფეხურებს შეადგენდნენ "სუპერმოდერატორები", მოდერატორები" და ე.წ. "ვაჭრები".