სთარმენი ასტეროიდთა სარტყელში შედის - ილონ მასკმა ბოლო ფოტო გამოაქვეყნა

ეს საინტერესოა - 17:18, 08 Feb, 2018

2387

ალბათ უკვე ყველამ იცით, რომ 6 თებერვალს, Space X-ის გიგანტური ხომალდი Falcon Heavy, რომლის მიზანიც მარსის ორბიტაზე გასვლაა, კოსმოსში გაეშვა და ახლა კოსმოსში, SpaceX-ისა და Tesla-ს დამფუძნებელის ილონ მასკის მანქანა Tesla Roadster-ი მოგზაურობს, რომლის საჭესთან სკაფანდრიანი მანეკენი სთარმენი ზის.

ილონ მასკმა სთარმენის ბოლო ფოტო გამოაქვეყნა და გვამცნო, რომ მანქანა მალე ასტეროიდთა სარტყელში გადანაცვლებს.

Roadster-ის ბოლო ფოტო ნამდვილად შთამბეჭდავია. ვიმედოვნოთ, რომ ის წარმატებულად განაგრძობს კოსმოსში მოგზაურობას და ნაწილებად არ დაიშლება.

ასტეროიდთა სარტყელი არის რეგიონი მზის სისტემაში, რომელიც პლანეტების - მარსისა და იუპიტერის ორბიტებს შორის მდებარეობს და რომელშიც კონცენტრირებულია მცირე პლანეტებად (პლანეტოიდები), ასტეროიდებად წოდებული, ძირითადად არასწორი ფორმის სხეულები, რომლებსაც სხვადასხვა ზომა და შემადგენლობა გააჩნიათ.

ასტეროიდთა სარტყელი ასევე არის ერთგვარი წყალგამყოფი, რომელიც მზის სისტემას ყოფს ორ თვისობრივად განსხვავებულ ნაწილად- შიდა და გარე მზის სისტემად. სივრცეს მზიდან ასტეროიდთა ძირითადი სარტყლის ჩათვლით, რომელშიც დედამიწის ტიპის პლანეტებია (მერკური, ვენერა, დედამიწა, მარსი) განლაგებული, შიდა მზის სისტემას, ხოლო ასტეროიდთა სარტყელს მიღმა არსებულ სივრცეს, რომელშიც გაზის გიგანტები (იუპიტერი, სატურნი, ურანი, ნეპტუნი) არიან მოთავსებული, გარე მზის სისტემას უწოდებენ.

შეგახსენებთ, ილონ მასკმა 2018 წლის 6 თებერვალს, კენედის სახელობის კოსმოსური ცენტრიდან ყველაზე დიდი, ზემძიმე რაკეტა-მატარებელი Falcon Heavy გაუშვა და აფრენა წარმატებელი აღმოჩნდა.

ეს ხომალდის სატესტო გაფრენაა და რადგან პირველი გაშვებისას ხშირია ტექნიკური პრობლემები, Falcon Heavy-ზე ნამდვილი ტვირთი არ არის. მის ნაცვლად კოსმოსში მასკის ძველი, ალუბლისფერი, Tesla-ს სპორტული ავტომობილი გაემგზავრა, რომელშიც მანეკენი, სახელად Starman ზის. როდესაც ხომალდი კოსმოსში გავიდა, Tesla Roadster-ის სტერეო სისტემაში დევიდ ბოუის სიმღერა ჩაირთო.

ილონ მასკმა ინსტაგრამზე გამოაქვეყნა ფოტო, რომელიც კოსმოსური ცივილიზაციებისთვის მესიჯია, იმ შემთხვევაში თუკი Tesla-ს მანქანით მფრინავ მანეკენს შეხვდებიან.

დიახ, თუ ჩვენი სთარმენი კოსმოსურ ცივილიზაციებს შეხვდება და მათ მანქანას ათხოვებს, მნიშვნელოვან ამბავსაც გააგებინებს.

სიტყვები „დამზადებულია დედამიწაზე ადამიანების მიერ“ - მანქანაზეა ამოტვიფრული.