მამა ელიზბარი: „ძალიან ბევრს „ოცნების“ ხსენებაც არ უნდა...“

საზოგადოება - 14:02, 25 Jul, 2013

2242

სასულიერო პირმა ამის შესახებ გაზეთ „ალიას“ განუცხადა და დაამატა, რომ ახლანდელი ხელისუფლება ეშმაკთანაა კოჰაბიტაციაში, რაც ხალხის გაღიზიანების მიზეზი გახდა: „იმდენად დიდი ნიჰილიზმია ერში, საზოგადოებაში, ეკლესიაში მიმდინარე პროცესების გამო, ჩვენდა საუბედუროდ, ძალიან ბევრს „ოცნების“ ხსენებაც არ უნდა, ადრე ვამბობდით,- კაცი იმედით ცოცხლობს. ახლა ვამბობთ, - კაცი ოქტომბრით ცოცხლობს.

რა გახდა ეს ოქტომბერი, ლენინიდან დაწყებული, ვერ მოვიცილეთ ოქტომბრის იმედი. ოქტომბრის რევოლუცია მოხდებოდა და ხალხს ეგონა, აყვავდებოდა.

ისე აყვავდა ჩვენი ავადმახსენებლი, როგორც ჩვენ ავყვავდით. ახლა არის და ყველა იმედით შევცქეროდით 1-ლი ოქტომბრის არჩევნებს, გვეგონა ყველაფერი კარგად იქნებოდა, ორ მღვდელს ასამართლებ, ცოტა რომ გათამამდები, ალბათ სააკაშვილის მეთოდებსაც გამოიყენებ და დაგვიჭერ...

ახლა, კიდევ ოქტომბრის იმედი გვაქვს, გვიხარია, - არიქა მოვა ოქტომბერი და მიშა წავა. სად წავა მიშა? არსად ვუშვებთ, და... რას ვხედავ, იცი? შენ რომ ოქტომბერში მიშას გააგდებ და ქვეყანას ააყვავებ, არ ჰგავხარ იმ კაცს, საამისო მზადებას ვერ გატყობ... კოჰაბიტაციაში ხარ ეშმაკთან...

ეს ნიჰილიზმი სადამდე მიიყვანს საზოგადოებას, არ ვიცი. საარჩევნოდ დაწყებულ ბატალიებში მომიწევს მონაწილეობა, ყველა დაბნეულია და კითხულობს, ვის მისცეს ხმა საპრეზიდენტო არჩევნებში...“, - ამბობს მამა ელიზბარ დეკანოიძე.