რუსთავში, "გეპეის" ყოფილ შენობაში შესახლებულები შენობის დატოვებას არ აპირებენ

საზოგადოება - 13:32, 25 Jul, 2013

795

"გეპეის" შენობაში შესახლებულები ლტოლვილთა და განსახლების სამინისტროს მიერ დაქირავებულ სამშენებლო კომპანია "ენ ბი ჯი"-ს წარმომადგენლებს ოთახების დათვლაზე უარს ეუბნებოდნენ. მათ სამშენებლო კომპანიის მშენებლებს შენობის ეზოში შესასვლელი კარი ჩაუკეტეს და ტერიტორიაზე შესვლის საშუალებას არ აძლევდნენ.

როგორც "ენ ბი ჯის" წარმომადგენელმა გოჩა ენდელაძემ "ინტერპრესნიუსთან" საუბარში განაცხადა, შენობა ლტოლვილთა და განსახლების სამინისტროს ეკუთვნის.

მისივე თქმით, "გეპეის" ყოფილი შენობის გასარემონტებლად ტენდერი გამოცხადა, რომელშიც სამშენებლო კომპანია "ენ ბი ჯიმ" გაიმარჯვა. ენდელაძის განცხადებით, დღეს აღნიშნულ მისამართზე მუშებთან ერთად მივიდნენ, თუმცა შენობაში შესახლებულებმა შიგნით შესვლის საშუალება არ მისცეს, არადა კომპანიას შენობის რემონტზე ვალდებულება აქვს აღებული და სამუშაოები დეკემბერში უნდა დაასრულოს.

"გეპეის" ყოფილ შენობაში მცხოვრები ოჯახები შენობის დაცლაზე კატეგორიულ უარს აცხადებენ და ამბობენ, რომ თითოეული მათგანი სოციალურად დაუცველი უბინაოა. მათი თქმით, აღნიშნულ შენობაში 10 თვეა რაც ცხოვრობენ და წასასვლელი არსად არ აქვთ, ამიტომ შენობის დატოვებას არ აპირებენ.