ამის შესახებ გამოცემა kkpress.ge იტყობინება. მსჯავრდებულების ოჯახის წევრების განცხადებით, გიორგი ხურციძე და ლევან კუტალაძე, ე.წ. უდოს კომისიის მიერ მათი საქმეების გადახედვამდე ამგვარი პროტესტის შეწყვეტას არ აპირებენ.

"პატიმრების მიერ პროტესტის მსგავსი ფორმით გამოხატვის საფუძველი იყო უდოს კომისიის მიერ მათ საქმესთან დაკავშირებით გაკეთებული წინასწარი შეფასებები. მათ რამოდენიმე დღის წინ პირი ამოიკერეს და უარს აცხადებენ სამედიცინო დახმარების აღმოჩენაზეც. მას შემდეგ რაც გიორგიმ შუამდგომლობით მიმართა კომისიას და საქმის განხილვა ივლისის თვისთვის ითხოვა, კომისიის წარმომადგენლებმა განუცხადეს, რომ პატიმრობისას მას გარკვეული დარღვევები ჰქონდა ჩადენილი რის გამოც მისი საკითხი დადებითად არ გადაწყდებოდა. მსგავსი მოთხოვნით ამოიკერა პირი ლევან კუტალაძემაც. კომისია მათი შუამდგომლობების განხილვას მომავალი თვისთვის გეგმავს. რასაც აპროტესტებენ მსჯავრდებულები",- აცხადებს პატიმრის მამა, იაშა ხურციძე.

მისივე ინფორმაციით, შიმშილობის აქციას 15 პატიმარი შეუერთდა. " როგორც ჩემთვის გახდა ცნობილი, მე-17 დაწესებულებაში 15 პატიმარი უკვე შიმშილობს და იმ შემთხვევაში, თუ მსჯავრდებულების ვადაზე ადრე გათავისუფლების კომისია მათ საქმეებს უახლოეს მომავალში არ განიხილავს, საპროტესტო გამოსვლას სხვა პატიმრებიც შეუერთდებიან",-აღნიშნა ხურციძემ.

აღნიშნულ ინფორმაციას არ ადასტურებენ სასჯელაღსრულების სამინისტროში და აცხადებენ, რომ მე-17 დაწესებულებაში ამ დრომდე ორი პატიმარი შიმშილობს. "

რუსთავის-მე17 დაწესებულებაში ამ დრომდე აგრძელებენ შიმშილობას გიორგი ხურციძე და ლევან კუტალაძე. სხვა მსჯავრდებულების მიერ მსგავსი საპროტესტო ქმედების მიმართვის ინფორმაციას ვერ დავადასტურებ",- განაცხადეს სამინისტროს პრესსამსახურში.