დაბა თიანეთის გაზიფიცირების პირველი ეტაპი დასრულდა

საზოგადოება - 17:52, 24 Jul, 2013

572

კომპანია "სოკარ გაზ ჯორჯია" დაბა თიანეთის გაზიფიცირებას ორ ეტაპად ახორციელებს. ამ დროისათვის, პირველ ეტაპზე დაგეგმილი სამუშაოები დასრულდა, რომლის ფარგლებში დაბა თიანეთის მიმართულებით 11კმ სიგრძის გაზსადენი აშენდა, რაც დაბაში მცხოვრებ 301 პოტენციურ აბონენტს გაზის საერთო ქსელში ჩართვის შესაძლებლობას მისცემს.

დღეისათვის შიდა ქართლისა და მცხეთა-მთიანეთის რეგიონებში აშენებულია 496,4 კმ გაზის ქსელი და გაზიფიცირებულია 16 500 აბონენტი. მიმდინარე წლის ბოლომდე, კომპანია აღნიშნულ რეგიონებში 625კმ სიგრძის გაზსადენის მშენებლობას გეგმავს, რომლის დასრულების შემდეგ გაზის ქსელში 20 872 პოტენციური აბონენტი ჩაერთვება.

ენერგეტიკის სამინისტროსა და გაზგამანწილებელმა კომპანიების მიერ შემუშავებული გეგმის თანახმად, საქართველოს მასშტაბით 2014 წლის ბოლომდე 86 ათასზე მეტი ოჯახი გაზიფიცირდება.

გეგმის განხორციელების შემდეგ, გაზიფიცირებული იქნება დამატებით252 სოფელი და ახალი ინფრასტრუქტურის შექმნაში ათობით მილიონი ლარის ინვესტიცია განხორციელდება.

ამასთან, გაზგამანაწილებელი კომპანიები მოსახლეობას ოჯახში ბუნებრივი აირის შესაყვანად საჭირო თანხის რამდენიმე თვეზე გადანაწილებას სთავაზობენ. ენერგეტიკის სამინისტროსთან შეთანხმებით, აღნიშნული თანხა თვიურად 25 ლარს არ უნდა აღემატებოდეს.