აშშ-ის ტანმოვარჯიშეთა ნაკრების ყოფილ ექიმს ლარი ნასარს ინდიანას შტატის სასამართლომ 175 წლით თავისუფლების აღკვეთა მიუსაჯა. მას ბრალად სპორტსმენების სექსუალური შევიწროება ედება. სასამართლომ 156 დაზარალებულის ჩვენება მოისმინა.

ნასარმა თავი დამნაშავედ ცნო 10 ტანმოვარჯიშის მიმართ განხორციელებულ სექსუალურ ძალადობაში, მათ შორის არიან ოლიმპიური ნაკრების წევრებიც. როგორც სასამართლოზე გახდა ცნობილი, ნაკრების ექიმი სამედიცინო პროცედურების ჩატარების ნაცვლად, არასრულწლოვან ტანმოვარჯიშეებზე სექსუალურად ძალადობდა.

ადრე 54 წლის ექიმს ფედერალური სასამართლოს მიერ უკვე მისჯილი ქონდა 60 წლით პატიმრობა, ბავშვთა პორნოგრაფიის შენახვის გამო.

„ჩემთვის დიდი პატივია, მოვუსმინო ჩემი დების ჩვენებებს, რომლებმაც ეს ძალადობა გადაიტანეს, ასევე მერგო პატივი და პრივილეგია, რომ თქვენ განაჩენი გამოგიტანოთ . თქვენ, ბატონო, არ იმსახურებთ იმას, რომ ოდესმე თავისუფლებაზე აღმოჩნდეთ. თქვენ ვერც კი აცნობიერებთ რა ჩაიდინეთ. მე იმის უფლებასაც კი არ მოგცემდით რომ ჩემი ძაღლებისთვის მოგევლოთ.“- მიმართა მოსამართლემ ბრალდებულს განაჩენის გამოცხადებისას.