შინაგან საქმეთა სამინისტროში ადასტურებენ, რომ დამამძიმებელ გარემოებებში განზრახ მკვლელობის ბრალდებით ორი პირი დააკავეს, დანაშაულის შეუტყობინებლობისთვის კი დაკავებულია კიდევ ერთი პირი. ამის შესახებ და მკვლელობის სხვა დეტალებზე "პრაიმტაიმი" წერს.

მოკლული 26 წლის უზბეკი გოგონას ცხედარი ბეშუმის ტყეში 3 ივლისს იპოვეს. თავდაპირველად გამოძიება დაუდგენელი პირის თვითმკვლელობამდე მიყვანის ფაქტზე დაიწყო, თუმცა გამოძიების პროცესში გაირკვა, რომ გარდაცვლილი უზბეკეთის მოქალაქე რაიხონ კურამბაევაა.

,,პარიმტაიმის" ცნობით, გარდაცვლილი ბათუმში მდებარე კლუბ "არენაში" მუშაობდა და დაახლოებით თვენახევრის განმავლობაში რაიხონ კურამბაევა პროსტიტუციაში იყო ჩაბმული.

კვალი ბათუმში, ხიმშიაშვილის ქუჩაზე ერთ-ერთ საცხოვრებელ სახლთან მიდის, რომელიც ჰქონდა ნაქირავები ასევე უზბეკეთის მოქალაქე ნარგიზ ბეგიმ რაკჰმანოვას, რომელიც ორგანიზებას უწევდა უზბეკი გოგონების პროსტიტუციაში ჩაბმას (რაკჰმანოვამ მისი ჯგუფის წევრების დაკავებისას გაქცევა მოახერხა).

როგორც ,,პრაიმტაიმი" წერს რაკჰმანოვამ გარდაცვლილი რაიხონ კურამბაევა მიავლინა ბათუმის დისკოკლუბ "არენაში" და მხოლოდ მისი სექსუალური ექსპლუატაციის შედეგად, 3000 აშშ დოლარი მიიღო. მას შემდეგ კი, რაც კურამბაევამ თავის დაღწევა სცადა, მას სასტიკად გაუსწორდნენ.

როგორც ცნობილია, უზბეკი გოგონას მკვლელობა 2000 დოლარად რაკჰმანოვამ ორ პირს შეუკვეთა. ორივე პირი დაკავებულია. ასევე დაკავებულია ტაქსის მძღოლი დანაშაულის დაფარვის ბრალდებით.