ბრიტანელი ტურისტი, რომელსაც თავი ბიბლიური წინასწარმეტყველი ჰგონია, უდაბნოში დაიკარგა

ეს საინტერესოა - 17:32, 18 Jan, 2018

2338

ნოემბერში ისრაელში ბრიტანელი ტურისტი დაიკარგა, პოლიცია უკვე ორი თვეა მის მოძებნას ვერ ახერხებს, ეჭვობენ, რომ მას შესაძლოა იერუსალიმის სინდრომი სჭირდეს.

29 წლის ქრისტიანი ოლივერ მაკაფი იერუსალიმში ნოემბერში ჩავიდა. ის ქვეყნის ჩრდილოეთიდან სამხრეთით ველოსიპედით მოგზაურობდა. დიდ ბრიტანეთში 1 დეკემბერს უნდა დაბრუნებულიყო, თუმცა ასე არ მოხდა. უკანასკნელად მაკაფი 21 ნოემბერს ნეგევის უდაბნოში შეამჩნიეს.

ბრიტანელის ძებნა მას შემდეგ დაიწყეს, რაც ტურისტების ჯგუფმა უდაბნოში მისი საფულე და ნოუთბუქი იპოვა. მოგვიანებით პოლიციამ უდაბნოს სხვა ადგილზე იპოვა მისი ველოსიპედი, ჩანთა და ტანსაცმელი. ნივთები ხელშეუხებელი იყო , რაც საფუძველს იძლეოდა ეფიქრათ, რომ ის დაყაჩაღების მსხვერპლი არ ყოფილა.

პოლიცია განიხილავს იმ ვარიანტს, რომ მაკაფიმ თავად დატოვა ყველაფერი და უდაბნოში გაემგზავრა, იმის გამო რომ მას იერუსალიმის სინდრომი დაემართა.

იერუსალიმის სინდრომი — განსაკუთრებით იშვიათი ფსიქიკური აშლილობის ფორმა, რომელიც განდიდების მანიის ერთ-ერთ ფორმას წარმოადგენს. ამ სინდრომით დაავადებული ტურისტები და მომლოცველები, რომლებიც იერუსალიმში იმყოფებიან, წარმოიდგენენ და გრძნობენ, რომ ფლობენ ღვთაებრივ და წინასწარმეტყველურ ძალას, არიან რომელიმე ბიბლიური გმირის რეინკარნაცია და მათზე დაკისრებულია სამყაროს ხსნის წინასწარმეტყველური მისია.

იერუსალიმის სინდრომი კლინიკურად პირველად 1930 წელს აღწერეს, მისი გამოვლენის ინდივიდუალური შემთხვევები კი შუა საუკუნეებიდანაა ცნობილი, ეს სინდრომი თანაბრად ემართებათ ქრისტიანებს,, მუსლიმებს და იუდეველებს, წელწადში რამდენიმე ათეული შემთხვევა ფიქსირდება, დაახლოებით ნახევარს კი ჰოსპიტალიზაცია სჭირდება.