მძიმე პოლიტიკური გაზაფხული - ინტრიგები ივანიშვილის კარზე

პოზიცია - 14:46, 18 Jan, 2018

7211

ის ინფორმაცია, რომელიც მმართველი პოლიტიკური გუნდიდან ჟონავს, ვერ ვიტყვით, რომ რევოლუციის საბაბი გახდება, მაგრამ აშკარაა, რომ „ოცნებაში“ სერიოზული შიდა არეულობაა, რაც შესაძლოა, დიდი „პერეტრუბაციებით“ დამთავრდეს. ზოგადად, „ოცნებისეულ“ არეულობას პირად საუბრებში არც თავად „მეოცნებეები“ უარყოფენ. უფრო მეტიც, მმართველ პარტიაში არსებულმა გარჩევებმა, როგორც „ნიუპოსტს“ ეუბნებიან, ყოფილი პრემიერის, ანუ ბიძინა ივანიშილის ყურამდეც მიაღწია. ჩვენი ინფორმაციით, არაოფიციალური მმართველი მილიარდერი რიგგარეშე არჩევნებსაც ითხოვდა, მისი მთავარი სამიზნე კი პარლამენტის თავმჯდომარე ირაკლი კობახიძე, უმრავლესობის წევრი მამუკა მდინარაძე და კიდევ რამდენიმე დეპუტატი იყო. როგორც ,,ნიუპოსტს“ უყვებიან, ექსპრემიერმა პირდაპირ მოითხოვა კობახიძის და მისი გუნდის ,,მოშორება“ და რიგგარეშე არჩევნების დანიშვნა. ჩვენი წყაროს ცნობით, ივანიშვილი გადაარწმუნეს - ,,ახლად ჩატარებული არჩევნების ფონზე, კობახიძის და მისი გუნდის სახლში გაშვების გადაწყვეტილება ამომრჩევლისთვის რთულად ასახსნელი იქნებოდა, ხოლო რიგგარეშე არჩევნები ქართული ოცნების წისქვილზე წყალს არ დაასხამდა“ - ჰყვება წყარო.

ექსპრემიერის განრისხება ჯერ კიდევ საკონსტიტუციო ცვლილებების დროს მიმდინარე პროცესებმა გამოიწვია. ,,ნიუპოსტი“ ამის შესახებ გასულ წელს წერდა, კერძოდ, მაშინ მმართველი გუნდი მზად იყო მაჟორიტარული სისტემა დაეთმო, თუმცა, შუშის სასახლიდან მიღებულმა ზარმა ყველაფერი შეცვალა, სწორედ ირაკლი კობახიძე იყო, რომელიც ამბობდა, რომ თუ მაჟორიტარული სისტემა არ შეიცვლებოდა, ის თანამდებობას დატოვებდა, მოგვიანებით კი, ექსპრემიერის შემონათვალის შემდეგ, პარლამენტის თავმჯდომარემ განაცხადა, რომ მან იხუმრა.

ამას გარდა, ისევ აქტუალურია „ოცნების“ კლანების თემაც. კერძოდ, „ნიუპოსტს“ ეუბნებიან, რომ იგივე უმრავლესობის ის წევრები, რომლებიც ბოლო დრომდე გიორგი კვირკაშვილის აპეკუნებად ითვლებოდნენ, ნელ-ნელა თბილისის მერის, კახა კალაძის ნავში სხდებიან. ზოგადად, კალაძე, როგორც წყაროები ამბობენ, „ოცნების“ გარკვეული ნაწილისთვის დიდი თავის ტკივილია. მმართელ გუნდში იმასაც ხვდებიან, ადრე თუ გვიან ოლიგარქი აუცილებლად დაწმინდავს ოცნებას და შეეცდება მომდევნო საპარლამენტო არჩევნებისთვის სხვა გადანაწილებით შეინარჩუნოს ძალაუფლება. ამ ფონზე წინ რომელი პოლიტიკური ცენტრი წამოიწევს - კალაძის, კვირიკაშვილის თუ სხვა რომელიმე ნებისმიერის, ამას მილიარდელისთვის არსებითი მნიშვნელობა ალბათ არც ექნება - მთავარია, მასზე დამოკიდებული და მისი ინტერესების გამტარებელი იყოს იმ მთავარ ბრძოლაში, რომელიც ბიძინა ივანიშვილს ჯერ კიდევ გამართული აქვს მთავარი პოლიტიკური ოპონენტის - მიხეილ სააკაშვილის წინააღმდეგ.

როგორი პოლიტიკური გაზაფხული დადგება, ამას დრო და უკრაინაში განვითარებული მოვლენები გვიჩვენებს.

მანამდე კი მიმდინარე წელს საქართველოს საპრეზიდენტო არჩევნები ელის. ჯერ უცნობია, ვინ იქნება სახელისუფლო კანდიდატი. საუბრები კვირიკაშვილზე, ჯანელიძესა და სერგეენკოზე, მხოლოდ პოლიტიკურ ვარაუდებად რჩება. მედია და პოლიტიკური სპექტრი გიორგი მარგველაშვილის გადაწყვეტილებასაც ელოდება - მიიღებს თუ არა საარჩევნო გამოწვევას და ექნება თუ არა ოპოზიციის მხარდაჭერა? თავად ოპოზიციაშიც პოლიტიკური დუმილია. ყველაფერს, როგორც ზემოთ აღვნიშნეთ, გაზაფხული გვიჩვენებს...