დაადებს თუ არა პრეზიდენტი "მაუწყებლობის შესახებ" კანონპროექტს ვეტოს - მარგველაშვილის გადაწყვეტილება დღეს გახდება ცნობილი

პოზიცია - 09:26, 15 Jan, 2018

1127

დაადებს თუ არა პრეზიდენტი "მაუწყებლობის შესახებ" კანონპროექტს ვეტოს, დღეს გახდება ცნობილი. დღეს იწურება 10-დღიანი ვადა, რომლის შემდეგაც პრეზიდენტმა ხელი უნდა მოაწეროს პარლამენტის მიერ სამი მოსმენით მიღებულ კანონპროექტს ან მოტივირებული შენიშვნებით უკან დაუბრუნოს პარლამენტს.
კანონპროექტის მიხედვით, საზოგადოებრივ მაუწყებელს უფლებამოსილება უფართოვდება - სხვა ცვლილებებთან ერთად, მის ეთერში დასაშვები ხდება კომერციული რეკლამის განთავსება სამუშაო დღეებში.

ოპოზიცია პრეზიდენტს ვეტოს გამოყენებისკენ მოუწოდებს.

„წარმოუდგენელია, რომ დღეს პრეზიდენტმა არ გამოიყენოს ვეტოს უფლება. ვინაიდან, ეს კანონი ძალიან ლახავს კერძო ტელეკომპანიების ინტერესებს, ის ხელს უშლის საქართველოში თავისუფალი სიტყვის განვითარებას და ამავე დროს, ეს კანონი ცუდია თვით საზოგადოებრივი მაუწყებლის განვითარებისთვის,“ - განაცხადა პარლამენტის ფრაქცია ”ნაციონალური მოძრაობის” თავმჯდომარემ რომან გოცირიძემ.

„ევროპული საქართველოს“ წევრები აღნიშნავენ, რომ „ხელისუფლებამ მიიღო კანონი, რომელიც ერთის მხრივ ახალისებს კორუფციას, ასევე პროტექციონიზმს და ხდება უფრო უკონტროლო და გარდა ამისა, ზღუდავს თავისუფალი მედიის სარეკლამო ბაზარს".

რაც შეეხება საპარლამენტო უმრავლესობას, "ოცნება" ვეტოს დასძლევად ემზადება.

„ჩვენ ვართ მოლოდინის რეჟიმში რა თქმა უნდა, ისევე როგორც ყველა სხვა შემთხვევაში, მთავარია გავეცნოთ იმ საკითხებს, რას წარმოადგენს პრეზიდენტი. იქნება ეს მოტივირებული, არ იქნება ეს მოტივირებული. მხოლოდ ამის შემდეგ გადავწყვეტთ ჩვენ გათვალისწინება არ გათვალისწინების საკითხს,“ - ამბობს ანრი ოხანაშვილი.