იშხნის რესტავრაციის ვადამ გადაიწია

საზოგადოება - 18:22, 22 Jul, 2013

530

კულტურისა და ძეგლთა დაცვის სამინისტროს ცნობით, ქართველ ექსპერტთა პირველი და მეორე სამუშაო შეხვედრის შედეგად შემუშავებული რეკომენდაციები თურქეთის მხარის მიერ დიდწილად უკვე გათვალისწინებულია.
დამუშავებულია ძეგლის საინჟინრო-კონსტრუქციული გაძლიერების პროექტი, რომელიც აქამდე არ არსებობდა. თურქი სპეციალისტების მიერ იატაკის დამცავი ფენა ინერტული მასის დამატებითი ფენებით გაძლიერდა.
სამინისტროში აცხადებენ, რომ სამუშაოები იშხანში პროფესიონალი არქეოლოგების ზედამხედველობის გარეშე აღარ ხორციელდება.

კულტურის სამინისტროში ოშკის სამონასტრო კომპლექსთან დაკავშირებით აცხადებენ, რომ აქ სამუშაოები 2013 წლის აგვისტოში უნდა დაწყებულიყო, თუმცა პროექტის სრულყოფისა და შეცდომებისგან თავის დაზღვევის მიზნით, თურქეთის მხარემ პროექტის დასრულების ვადა 2013 წლის დეკემბრამდე გაახანგრძლივა.

კულტურის სამინისტროს ინფორმაციით, 2013 წლის 18-19 ივლისის ვიზიტისას ქართველი სპეციალისტები ძეგლზე არსებულ ვითარებას კიდევ ერთხელ გაეცნენ. მათ თურქ კოლეგებს მეთოდური და ტექნიკური ტიპის მითითებები და რეკომენდაციები გააცნეს, რომლებიც მოგვიანებით თურქეთის მხარეს ოფიციალური სახით გადაეგზავნება.

ვიზიტის შედეგად შედგა შეთანხმება, რომ იშხნის დასავლეთ მკლავის ჩრდილოეთის მინაშენზე ახლადაღდგენილი საპირე წყობის სათანადო დამუშავება განხორციელდება, რაც არსებულ მდგომარეობას გარკვეულწილად გამოასწორებს.
ქართული მხარის რეკომენდაციით, იშხანში მომუშავე სამშენებლო კომპანიამ, თხოვნით მიმართა შესაბამის სამსახურს სტამბოლში, რათა იშხანში მივლინებულ იქნას კედლის მხატვრობის კონსერვაციის სპეციალისტი.