ეს პოლიტიკური საქმეა, ჩემს გაჩუმებას ცდილობენ - სააკაშვილი საქართველოს ყოფილი გენერალური კონსულის სასამართლოზე

მსოფლიო - 16:42, 13 Jan, 2018

2613

კიევში დღეს საქართველოს ყოფილი გენერალური კონსულის თემურ ნიშნიანიძის საქმეზე სასამართლო პროცესი გაიმართა. მას საქართველოს მესამე პრეზიდენტი მიხეილ სააკაშვილი დაესწრო და ჟურნალისტებს სიტყვით მიმართა. მისი განცხადებით ეს საქმე შეთითხნილია, პოლიტიკურ ხასიათს ატარებს და ამ საქმით უკრაინის ხელისუფლება მის შეჩერებას ცდილობს.

"მე გამაფრთხილეს, რომ მას დააპატიმრებდნენ და აი, აპატიმრებენ კიდევაც. მე ჩემს მორალურ ვალდებულებად ვთვლი ამ ადამიანს მხარი დავუჭირო, ვინაიდან ვიცი, სად არის ძაღლის თავი დამარხული. ის საერთოდ არაფერ შუაშია. მთელი ისტორია მე მეხება და ჩემს გაჩუმებას ცდილობენ.

თემურ ნიშნიანიძეს, საქართველოს ყოფილ გენერალურ კონსულს, რომელიც ოდესაში მეხმარებოდა, შვიდი წლის წინანდელი "საქმის" გამო აპატიმრებენ, როდესაც მას დიპლომატიური იმუნიტეტი ეხებოდა.

იმას რომ თავი დავანებოთ, რომ ეს საქმე საერთოდ შეთითხნილია, მისი გასამართლება ვენის 1961 წლის კონვენციისა და უკრაინის კანონმდებლობის სრული დარღვევაა, მაგრამ ვარცლთან მიმჯდარი ქურდებისა და ორსნებისათვის კანონები არ არსებობს," - წერს მიხეილ სააკაშვილი თავის ფეისბუქის გვერდზე.

თემურ ნიშნიანიძეს ბრალად ედება განსაკუთრებით დიდი ოდენობით სახელმწიფო სახსრების მითვისება, შეთქმულება და არაკანონიერი შემოსავლების გათეთრება.