პუტინის ბოლო გამოსვლებში პოროშენკოსადმი კეთილგანწყობა შეიმჩნევა

პუტინის ბოლო გამოსვლებში პოროშენკოსადმი კეთილგანწყობა შეიმჩნევა - რუსი პოლიტოლოგები

მსოფლიო - 17:50, 12 Jan, 2018

2672

რუსი პოლიტოლოგები მიიჩნევენ, რომ უკანასკნელ ხანებში, პრეზიდენტი პუტინი უკრაინისა და მისი პრეზიდენტის პეტრო პოროშენკოს მიმართ გარკვეულ თანაგრძნობის დემონსტრირებას ავლენს, თუმცა, ერთგვარი რბილი ირონიის აქცენტით.

11 იანვარს პუტინმა პოროშენკოს მალდივის კუნძლებზე დასასვენებლად გამგზავრების გამამართლებელი კომენტარი გააკეთა - "ვერაფერს საგანგაშოს ვხედავ, რომ სახელმწიფოს მეთაური ოჯახთან ერთად დასასვენებლად საზღვარგარეთ გაემგზავრა, მით უმეტეს, რომ პოროშენკო მდიდარი ადამიანია".

ამას მოჰყვა პუტინის განცხადება, რომ რუსეთი მზადაა, ყირიმში ჩარჩენილი სამხედრო ხომალდები და ტექნიკა უკრაინას დაუბრუნოს.

ამავე დღეს პუტინმა ხაზი გაუსვა იმ ფაქტს, რომ რუსეთსა და უკრაინას შორის სავაჭრო ტვირთბრუნვა გაიზარდა და გამოთქვა იმედი, რომ დონბასის პრობლემის მოგვარების შემდეგ, უკრაინასთან ურთიერთობის ნორმალიზება მოხდება,

ამ სამ განცხადებას პუტინის პრესმდივანმა პესკოვმა "პრეზიდენტის კეთილი ნების გამოხატვა" უწოდა.

ეს განცხადებები კეთდება იმ ფონზე, როდესაც ევროკავშირმა და საერთაშორისო სავალუტო ფონდმა პოროშენკოს უარი უთხრეს ახალ დაფინანსებაზე, რაც რთულ სიტუაციაში აგდებს მას, - აცხადებენ რუსი პოლიტოლოგები და მიიჩნევენ, რომ უკრაინის მოქმედმა ლიდერმა შესაძლოა წინამორბედის ბედიც გაიზიაროს.

"თუმცა აქ ერთი ფაქტორიც შეინიშნება - პუტინი პოროშენკოს მიმართ კეთილგანწყობასაც ავლენს და ცოტათი ტონში ირონიასაც ურევს," - აცხადებს რუსეთის ეროვნული სტრატეგიების ინსტიტუტის პრეზიდენტი, პოლიტოლოგი მიხეილ რემიზოვი.