ამერიკის შეერთებული შტატების სენატმა ოთხშაბათს სპეციალური ანგარიში გამოაქვეყნა, რომელშიც რუსეთს ადანაშაულებს დემოკრატიის წინააღმდეგ მიმართული ქმედებების დაგეგმვასა და განხორციელებაში. ანგარიშში საქართველოს შესახებაც არის საუბარი.

ანგარიში, სახელწოდებით, „პუტინის ასიმეტრიული თავდასხმა დემოკრატიაზე რუსეთსა და ევროპაში: შედეგები აშშ-ის ნაციონალური უსაფრთხოებისთვის“ დემოკრატმა სენატორმა ბენ კარდინმა წარადგინა.

სენატის საგარეო საქმეთა კომიტეტის დემოკრატი წევრების მიერ მომზადებული ანგარიშში საუბარია, რომ „რუსეთის პრეზიდენტის ვლადიმირ პუტინის რეჟიმმა შეიმუშავა გავლენის საზღვარგარეთ გავრცელების მრავალგვარი ინსტრუმენი და მექანიზმი და როგორც ჩანს ის მიზნად ისახავს, გამოიყენოს ყველა შესაძლო საშუალება იმისათვის, რომ დააზიანოს ტრანს-ატლანტიკური ქვეყნების დემოკრატიული ინსტიტუტები".

„ეს საფრთხე წარმოიშვა დონალდ ტრამპის ხელისუფლებაში მოსვლამდე დიდი ხნით ადრე და იარსებებს მას შემდეგაც. მაშინ, როდესაც პრეზიდენტი ტრამპი ფაქტობრივად უმოქმედოდაა, პუტინი კვლავ ავითარებს თავის ასიმეტრიულ არსენალს და ეძებს ბოლო 70 წლის განმავლობაში აშშ-სა და ევროპის მიერ შექმნილი დემოკრატიული და საერთაშორისო ინსტიტუტების წინააღმდეგ ბრძოლის საშუალებებს“ - განაცხადა სენატორმა კარდინმა ანგარიშის წარდგენისას.

ანგარიშში ნათქვამია, რომ "როგორც არასდროს, ახლა აშშ-ს ჰყავს ისეთი პრეზიდენტი, რომელიც ქვეყნის ეროვნული უსაფრთხოებისთვის მზარდ საფრთხეს ღიად აიგნორებს."

ანგარიშში საუბარია რუსეთის მხრიდან ევროპის ქვეყნებში განხორციელებულ კიბერომზე, სოციალურ მედიაში ყალბი ინფორმაციის გავრცელებაზე, პოლიტიკური ჯგუფების დაფინანსებაზე, კორუფციაზე, მკვლელობების მცდელობეზე, სამხედრო ოპერაციებზე, რომლებიც საქართველოსა და უკრაინის დემოკრატიული მთავრობის დესტაბილიზაციისკენ იყო მიმართული.

მოკვლევა თვეების განმავლობაში მიმდინარეობდა. ანგარიშის ავტორებს ჰქონდათ კომუნიკაცია იმ ქვეყნების ხელისუფლების წარმომადგენლებთანაც, რომლებიც კრემლის სამიზნე გახდნენ.

206-გვერდიან ანგარიშში დოკუმენტირებულია ინფორმაცია რუსეთის მიერ მის ფარგლებს გარეთ გავლენის გავრცელების მექანიზმებისა და ინსტრუმენტების შესახებ.