ნავალნის საპრეზიდენტო არჩევნებში მონაწილეობაზე უარი საბოლოოდ ეთქვა

ნავალნის საპრეზიდენტო არჩევნებში მონაწილეობაზე უარი საბოლოოდ ეთქვა - უზენაესი სასამართლოს გადაწყვეტილება

მსოფლიო - 18:04, 06 Jan, 2018

2437

რუსეთის უზენაესმა სასამართლომ ალეკსეი ნავალნის სარჩელი არ დააკმაყოფილა. ოპოზიციონერი პოლიტიკოსი პირველი ინსტანციის სასამართლოს გადაწყვეტილების გაუქმებას და ცენტრალური საარჩევნო კომისიის მიერ მისი პრეზიდენტობის კანდიდატად დარეგისტრირებას ითხოვდა.

უზენაესი სასამართლოს გადაწყვეტილებით, პირველი ინსტანციის განაჩენი უცვლელი დარჩა. ამრიგად ძალაში შევიდა რუსეთის ცენტრალური საარჩევნო კომისიის გადაწყვეტილება, რომელის მიხედვითაც ალეკსეი ნავალნის საპრეზიდენტო არჩევნებში მონაწილეობაზე უარი ეთქვა.

სასამართლო სხდომამ ნავალნის გარეშე ჩაიარა.

რუსეთის ცესკომ ნავალნის რეგისტრაციაზე უარის თქმის მოტივად მისი ნასამართლეობა დაასახელა, უწყების ინფორმაციით ალეკსეი ნავალნის ნასამართლეობა ჯერ არ გაქარწყლებულა, სწორედ ამ გადაწყვეტილებას ასაჩივრებდა სასამართლოს სხვადასხვა ინსტანციებში ოპოზიციონერი პოლიტიკოსი.

ალეკსეი ნავალნიმ საპრეზიდენტო არჩევნებში მონაწილეობის შესახებ განცხადება ჯერ კიდევ 2016 წლის დეკემბერში გააკეთა. საპრეზიდენტო არჩევნებისათვის ნავალნის კანდიდატურის დასახელებას მხარი დაუჭირა 600 ათასამდე ადამიანმა. რუსეთის რეგიონებში გახსნილია ოპოზიციონერი პოლიტიკოსის 79 საარჩევნო შტაბი, მიმდინარეობდა აქტიურ აგიტაციაც. ნავალნიმ და მისმა მომხრეებმა ამ დროის განმავლობაში შეძლეს მრავალათასიანი აქციების მოწყობაც.

ალეკსეი ნავალნი ერთ-ერთი ყველაზე ცნობადი ოპოზიციონერი პოლიტიკოსია რუსეთში. ლევადა-ცენტრის მიერ ივლისში რუსეთში ჩატარებული გამოკითხვის შედეგად მის შესახებ ინფორმაცია გამოკითხულთა 55% აქვს.

რუსეთში საპრეზიდენტო არჩევნები 2018 წლის მარტში გაიმართება.