მაკრონი ევროკავშირისგან „უარყოფილ“ ერდოღანს ელისეის სასახლეში ელოდება

მაკრონი ევროკავშირისგან „უარყოფილ“ ერდოღანს ელისეის სასახლეში ელოდება - რა საკითხებს განიხილავენ პრეზიდენტები

მსოფლიო - 12:53, 05 Jan, 2018

1732

დღეს, საფრანგეთის პრეზიდენტი ემანუელ მაკრონი პარიზში თურქ კოლეგას, რეჯეპ ტაიპ ერდოღანს უმასპინძლებს. პრეზიდენტების შეხვედრის ერთ-ერთი მთავარი თემა რეგიონალური კრიზისი, კერძოდ, სირიის საკითხი იქნება. ამასთან, საუბარი თურქეთში ადამიანის უფლებების დაცვასაც შეეხება. ერდოღანის პარიზში ვიზიტს მემერცხენე პოლიტიკოსები აპროტესტებენ.

ერდოღანის პარიზში ჩასვლა , 2016 წლის წარუმატებელი სახელმწიფო გადატრიალებისა და ამის გამო თურქეთში განხორციელებული რეპრესიების შემდეგ, ევროკავშირის წევრ ქვეყანაში ყველაზე მნიშვნელოვანი ვიზიტია.

რეჯეპ ტაიპ ერდოღანი ემანუელ მაკრონს ელისეის სასახლეში შუადღეს პირისპირ შეხვდება, სადილის შემდეგ კი, ორი პრეზიდენტი პრესის წინაშე წარსდგება.

ელისეის სასახლის განცხადებით, ემანუელ მაკრონისთვის მთავარ მიზანს დიალოგის ხაზის შენარჩუნება წარმოადგენს, თუმცა ის სხვა ლიდერებთან შეხვედრების მსგავსად, იმ აზრთასხვადასხვაობას არ დამალავს, რომელიც მას ერდოღანთან აქვს.

ემანუელ მაკრონის თქმით, დიალოგის მცდელობას საფუძველი ივლისში NATO-ს შეხვედრებზე ჩაეყარა, შემდეგ კი გაეროს გენერალური ასამბლეის კულუარებში. მაკრონმა და ერდოღანმა ამ პერიოდის განმავლობაში ტელეფონით არაერთხელ ისაუბრეს, მათ შორის თურქეთში ფრანგი ფოტოგრაფისა და ჟურნალისტის დაკავების საკითხზეც.

ანკარის მიერ განხორციელებულმა რეპრესიებმა ფაქტიურად შეაჩერა თურქეთის ევროკავშირში გაწევრიანების ხანგრძლივი მოლაპარაკებები. გერმანიის კანცლერმა გასული წლის სექტემბერში ფაქტობრივად ამ მოლაპარაკებების შეწყვეტის შესახებაც გააკეთა განცხადება, თუმცა ემანუელ მაკრონი ამის საპასუხოდ ევროკავშირისა და თურქეთი „ურთიერთობის რღვევის თავიდან აცილების“ მოწოდებით გამოვიდა და თურქეთს არსებითი პარტნიორი უწოდა.

„რეგიონალურ საკითხებზე, ორმხრივ სფეროებში, ჩვენ მაკრონთან ერთად სწორი მიმართულებით ვდგამთ ნაბიჯებს.“- განაცხადა ერდოღანმა ხუთშაბათს.