ირანში, დღეისათვის არსებული სიტუაციის შესაფასებლად „ნიუპოსტი“ სტრატეგიისა და საერთაშორისო კვლევის ფონდის უფროს მკვლევარს, საერთაშორისო ურთიერთობების სპეციალისტს გიორგი ბადრიძეს დაუკავშირდა. ექსპერტის განცხადებით, ამ ეტაპზე ირანის მოვლენების განვითარების პროგნოზირება რთულია, რადგან საპროტესტო აქციებში მონაწილეობენ ადამიანები, რომლებსაც სხვადასხვა მიზნები გააჩნიათ:

„ირანის მოვლენების პროგნოზირება ძალიან რთულია იმ მიზეზით, რომ საპროტესტო აქციებში მონაწილეობენ ადამიანები, რომლებსაც გააჩნიათ სხვადასხვა მიზნები. რაც მთავარია, ეს არ არის ერთიანი მოძრაობა, მას არ ჰყავს ერთიანი ლიდერი, შესაბამისად, არ არსებობს ერთიანი მიზანი.

იმის მოლოდინი, რომ ეს იქნება დემოკრატიული რევოლუცია, რომელიც ირანში ამ სახის სხვა რეჟიმს აღადგენს ან ახალ დემოკრატიულ, დასავლეთთან უფრო მეგობრულ რეჟიმს დაამყარებს, სრულიად უსაფუძვლოა ამ ეტაპზე“, - აღნიშნავს ექსპერტი.

ბადრიძე ამ ეტაპზე ვერ ხედავს შესაძლებლობას იმისას, რომ არსებული რეჟიმი ამ საპროტესტო აქციების გამო უახლოეს ხანში შეიცვალოს. მისივე თქმით, მიმდინარე მოვლენებმა, შესაძლოა, რეგიონზე გავლენა მოახდინონ და ეს პირველ რიგში, ლტოლვილების ნაკადით გამოიხატება. თუმცა, მხოლოდ იმ შემთხვევაში თუ არსებული პროტესტი გაძლიერდება და გაგრძელდება:

,,გავლენა შესაძლოა საკმაოდ სერიოზული იყოს მთელ რეგიონზე. ძალიან მალე ვიგრძნობთ, თუ საპროტესტო მოძრაობა გაძლიერდა და გაგრძელდა. ეს იქნება პირველ რიგში ირანიდან ლტოლვილების ნაკადის სახით. 1979 წლის ისლამურმა რევოლუციამ მრავალ ქვეყანაში გააჩინა ირანული დიასპორები, მათ შორის განვითარებულ და შორეულ ქვეყნებში. თუნდაც ბრიტანეთში, ძალიან ძლიერი ირანული სათვისტომოა. ეს არის, ძირითადად, საკმაოდ შეძლებული, გავლენიანი, მაღალი განათლების მქონე ხალხი. გავლენა ამას რეგიონზე შეიძლება ჰქონდეს თუ საპროტესტო მუხტი მოძებნის უფრო დიდ გამოსავალს, ვიდრე ეს დღეს არის. ამ ეტაპზე უფრო კონკრეტული პროგნოზების გაკეთება უპასუხისმგებლობაა, რადგან ძალიან ხშირად სასურველს ასაღებენ რეალობად, როდესაც ხედავენ დიდი ანტიდემოკრატიული ძალების საწინააღმდეგოდ მიმართულ დემოკრატიულ მოძრაობას. ჩვენ არ ვიცით, რამდენად დემოკრატიულია მოტივები, ყველაფერი დაიწყო ბანალური, სოციალური პრობლემებიდან. რა მიმართულებას მიიღებს, ეს დამოკიდებულია იმაზე, შეძლებენ თუ არა საპროტესტო აქციებში მონაწილეები გაერთიანებას და ლიდერის ყოლას“, - განმარტავს ექსპერტი.

რაც შეეხება ირანში არსებული რეჟიმის მიდგომას პრობლემის მიმართ, გიორგი ბადრიძე აღნიშნავს, რომ არსებული მმართევლობა, თავს, ყველანარი ძალის გამოყენებით დაიცავს, მათ შორის, შეიარაღებული ძალებითაც:

„გამომდინარე ირანში არსებული რეჟიმიდან, სამართლებრივი და დემოკრატიული მეთოდების გამოყენებას პროტესტის მონაწილეების წინააღმდეგ არ უნდა ველოდოთ. რეჟიმი დაიცავს თავს ყველა შესაძლებლობით, მათ შორის უხეში სამხედრო ძალით. ამ შემთხვევაში, პირველ რიგში, არსებობს ირანის რევოლუციის გუშაგთა სპეციალური სამსახური, შეიარაღებული ქვედანაყოფები. შეიარაღებულ ძალებში სამი დიდი სტრუქტურა არსებობს, აქედან ერთ-ერთი წმინდად იდეოლოგიურია, ირანული რევოლუციის მცველთა რაზმი ჰქვია მას. ეს ის ძალაა, რომელიც არანაირად არ შეხედავს დემოკრატიულ სტანდარტებს და გამოიყენებს ყველა უხეშ ძალას, დემონსტრაციებისა და საპროტესტო აქციების ჩასახშობად“, - აცხადებს გიორგი ბადრიძე „ნიუპოსტთან“ საუბრისას.