„ამბოხების მცდელობა დამარცხებულია“ - ირანი რევოლუციის გუშაგთა კორპუსის მეთაური კლინტონსა და პრომონარქისტებს ადანაშაულებს

მსოფლიო - 12:05, 04 Jan, 2018

4625

ირანის ისლამური რევოლუციის გუშაგთა კორპუსის მეთაურის, გენერალ მოჰამედ ალი ჯაფარის განცხადებით, ირანში მეამბოხეების გამოსვლები დასრულებული, აჯანყების მცდელობა კი ჩახშობილია. ირანელი გენერლის განცხადებას სააგენტო Fars-ი აქვეყნებს.

„ჩვენმა მტრებმა უნდა იცოდნენ, რომ ირანის წინააღმდეგ სამხედრო მუქარა და უსაფრთხოების საფრთხეები არ იმუშავებს. დღეს შეგვიძლია განვაცხადოთ, რომ არეულობა დასრულებულია და ამბოხების მცდელობა დამარცხებულია,“ - განაცხადა ჯაფარიმ.

გენერალ ჯაფარის თქმით, მტრების მარცხი ხალხის სიფხიზლემ გამოიწვია. მისი განცხადებითვე, ქვეყანაში ანარქია და არეულობა პრომონარქისტული ძალებისა და აშშ-ს ყოფილი სახელმწიფო მდივნის, ჰილარი კლინტონის წახალისებით მოხდა.

მანამდე ირანის ისლამური რევოლუციის გუშაგთა კორპუსის წარმომადგენელმა განაცხადა, რომ პოლიცია და უსაფრთხოების ძალები ირანის ქალაქებში სიტუაციას სრულად აკონტროლებენ.

შეგახსენებთ, მასობრივი საპროტესტო აქციები ირანის დიდ ქალაქებში 28 დეკემბერს დაიწყო. გამოსვლების თავდაპირველი მიზეზი პროდუქტებზე ფასების მკვეთრი ზრდა და ქვეყანაში უმუშევრობის მაღალი დონე გახდა. მოგვინებით სოციალურ ლოზუნგებს პოლიტიკურიც დაემატა, რომელიც ირანის პრეზიდენტის ჰასან როუჰანისა და უმაღლესი რელიგიური ლიდერის აიათოლა ალი ჰამეინის წინააღმდეგ იყო მიმართული. თავდასხმები მოხდა პოლიციის განყოფილებებსა და სასულიერო ლიდერების ოფისებზე.

საპროტესტო აქციების დროს მომიტინგეებსა და ძალოვნებს შორის შეტაკებების დროს 22 ადამიანი დაიღუპა, 450 აქტივისტი კი სამართალდამცავებმა დააკავეს და ისინი უახლოეს მომავალში სასამართლოს წინაშე წარსდგებიან.

გენერლის განცხადების მიუხედვად, ვრცელდება დაუდასტურებელი ცნობები იმის შესახებ, რომ ანტისახელისუფლებო გამოსვლები ამ დრომდე არ დასრულებულა.