მდინარე ალაზანზე მიმდინარე ნაპირსამაგრი სამუშაოები საქართველოს 200 ჰექტრამდე ტერიტორიას შეუნარჩუნებს

საზოგადოება - 15:37, 20 Jul, 2013

644

დავით ნარმანია ალაზნის მასშტაბურ ნაპირსამაგრ სამუშაოებს საუკუნის პროექტს უწოდებს, ვინაიდან უკვე მრავალი წელია, აღნიშნულ მონაკვეთზე მდინარის ადიდების დროს საქართველო ტერიტორიებს კარგავს. ალაზნის სანაპირო ზოლის გაუმაგრებლობის შემთხვევაში, საფრთხე ემუქრება საქართველოს ტერიტორიის 200 ჰექტარზე მეტ მიწას, რომელიც, წყლის მოვარდნის შემთხვევაში, მთლიანად ჩამოიშლება და საქართველოს ტერიტორიას მოწყდება.

რეგიონული განვითარების სამინისტროს საავტომობილო გზების დეპარტამენტმა პროექტის განხორციელება 2013 წლის მაისში დაიწყო. ამჟამად სამუშაოები კაკლისყურის ტერიტორიაზე მიმდინარეობს. ხდება ქვანაყარი ბერმით სუსტი ადგილების გამაგრება, რათა წარეცხვითი პროცესები შეჩერდეს.

კაკლისყურეში სამუშაოები ერთ კვირაში დასრულდება, რის შემდეგაც მომდევნო ორი მონაკვეთის ნაპირგამაგრება დაიწყება. მთლიანობაში, უნდა მოხდეს 15 ათასი კუბომეტრი ფლეთილი ქვის კარიერში დამუშავება და ამ მასალით მდინარე ალაზნის სანაპირო ზოლის გამაგრება.

სამუშაოებს ადგილზე კომპანია "გზა 2008" აწარმოებს, რომელსაც 80-ზე მეტი ადგილობრივი მუშა ჰყავს დასაქმებული. პროექტის ჯამური ღირებულება 1 მილიონ ლარამდეა. ალაზნის ნაპირსამაგრი სამუშაოები მიმდინარე წლის ნოემბერში დასრულდება.