მაიკროსოფტმა სმარტფონებისთვის მეგრულენოვანი კლავიატურა შექმნა

ეს საინტერესოა - 13:19, 23 Dec, 2017

9768

ონლაინ გამოცემა "ლაივპრესი" საინტერესო სიახლეზე გვიყვება.

მათთვის, ვინც სატელეფონო მიმოწერაში მეგრულს იყენებს, პროცესი კიდევ უფრო გამარტივდა და კომფორტული გახდა.

პოპულარულ აპლიკაციაში (SwiftKey Keyboard), რომელსაც 100 მილიონზე მეტი გადმოწერა აქვს, ქართული ანბანის ბაზაზევე, შეიქმნა მეგრული კლავიატურა - დაემატა ასო ჸ და ჷ, რომელიც მეგრული სიტყვების დიდ ნაწილში გამოიყენება. ამ ეტაპზე აპლიკაცია ფლეი მარკეტში ხელმისაწვდომია ანდროიდებისთვის, იგეგმება აიფონ ვერსიის მომზადებაც.

როგორც "ლაივპრესი" წერს, აპლიკაცია კომპიუტერული ტექნოლოგიების კორპორაცია „მაიკროსოფტის“ (Microsoft) თანამშრომლმა, ჯულიენ ბეილიმ კოლეგებთან ერთად შექმნა. მას ფეისბუკზე მეგრულენოვანი გვერდის „მარგალური ნინა - მეგრული ენა - Megrelian Language“ ადმინისტრატორი გიგა ქავთარაძე დაეხმარა.

„გვერდის მესენჯერში წერილი მომივიდა Julien Baley-ისგან, რომ სურს დავეხმარო მეგრული ლექსიკონების და მეგრული ტექსტების მოძიებაში, იმისთვის, რომ შექმნას მეგრული კლავიატურა, რაც ნიშნავს, არა რამე ახალი დამწერლობის შედგენას, არამედ ქართული ანბანის ბაზაზევე, დამატებით, კიდევ ორი მეგრული ასო-ნიშნის, ჸ-ს და ჷ-ს ჩამატებას ამ კლავიატურაზე, რომელიც მეგრული ენისათვის ძალიან მნიშვნელოვანია. რა თქმა უნდა, უარი არ მითქვამს და მე მას მივაწოდე მეგრული ლექსიკონების სხვადასხვა ვერსიები, მეგრული ვიკიპედიის ტექსტები და ასევე, ლექსები თუ სხვა ნაწერები, რაც კი არსებობს ინტერნეტ სივრცეში ამ ენაზე“- აცხადებს „ლაივპრესთან საუბრისას გიგა ქავთარაძე.

მისივე თქმით, ამ აპლიკაციაში ჩაშენდა მეგრული სიტყვების მაქსიმალური რაოდენობა, რამაც გააადვილა ამ ენაზე წერა. პარალელურად აპლიკაცია წერისას სიტყვებს ე.წ. სპელ ჩექერის ფუნქციის გამოყენებით ასწორებს.
„ასევე გვთავაზობს სავარაუდო წინადადების შესადგენ სიტყვებს თანმიმდევრულად. მაგალითად, თუ დაწერ "მუჭო"-ს, ავტომატურად გთავაზობს იქვე, სიტყვა "რექ"-ს ანუ "მუჭო რექ", (როგორ ხარ. ავტ)" - ამბობს ქავთარაძე.

წყარო: www.livepress.ge