ლონდონის სასამართლომ უკრაინელი მილიარდერისა და დნეპროპეტროვსკის ყოფილი გუბერნატორის, იგორ კოლომოისკის, ასევე "პრივატბანკის" კიდევ ერთი ყოფილი მფლობელის გენადი ბოგოლიუბოვის აქტივები დააყადაღა.

Financial Times-ის ცნობით, ვერდიქტი „პრივატბანკის“ აქტივებს, 2,5 მილიარდი დოლარის ღირებულების ქონებას ეხება.

„პრივატბანკმა“ ლონდონის სასამართლოში სარჩელი, მისი თანადამფუძნებლების მიმართ თავად შეიტანა და უკანონო ოპერაციებით გატანილი ბანკიდან 2 მილიარდი დოლარის დაბრუნება მოითხოვა.

კოლომოისკი დნეპროპეტროვსკის ოლქის გუბერნატორი იყო. უკრაინის პრეზიდენტმა თანამდებობიდან 2015 წლის 24 მარტს გაათავისუფლა.

შეგახსენებთ, 2017 წლის აგვისტოში, კიევის სასამართლომ კოლომოისკის ქონება დააყადაღა, ესენი: ტელეკომპანიის „1+1“ შენობა, ხორბლის ტერმინალი ოდესის ოლქში, ასევე ქარხნის შენობა დნეპროპეტროვსკში თვითმფრინავი Boeing და სხვა რამდენიმე შენობაა.

ქონების დაყადაღება „პრივატბანკიდან“ თანხის მიტაცების საქმის გამოძიების ფარგლებში მოხდა.

გამოძიების თანახმად, 2014 წელს, „პრივატბანკის“ ოფიციალურმა პირებმა, უკრაინის ეროვნული ბანკიდან 19 მილიარდი გრივნა მიითვისეს. ეს დაახლოებით 730 მილიონი დოლარია.

უკრაინის უსმხვილესი კერძო ბანკის „პრივატბანკის“ ნაციონალიზაცია 2016 წლის ბოლოს მოხდა. ბანკის მთავარმა აქციონერმა, იგორ კოლომოისკიმ მაშინ მომხდარს უკანონო ქმედება უწოდა. ამჟამად ბანკის 100% უკრაინის ფინანსთა სამინისტროს ეკუთვნის.