რუსეთის შსს-ს პრესსამსახურზე დაყრდნობით რუსული გამოცემა "უტრო.რუ" იტყობინება, რომ უკვე დაკავებულია ე.წ. კანონიერი ქურდი მერაბ ჯანგველაძე, იგივე "მერაბ სუხუმსკი".

მედიაში უკვე გაჩნდა ცნობები იმის შესახებ, რომ შესაძლოა, დაკავებული ქართველი კრიმინალური ავტორიტეტი დაკავშირებული იყოს ლეგენდარული "დედ ჰასანის" მკვლელობის ორგანიზებასთან.

"ორგანიზებული დანაშაულებრივი ჯგუფის ერთერთი ლიდერი მერაბ ჯანგველაძე (მერაბ სუხუმსკი) უნგრელმა სამართალდამცველებმა ბუდაპეშტის ერთერთ სასტუმროში დააკავეს. ის იტალიის ტერიტორიაზე მკვლელობის ჩადენაშია ეჭვმიტანილი.

ამავე დროს, იტალიელ სამართალდამცავებს ეჭვი აქვთ, რომ ბანდა "ქუთაისელებს" რამდენიმე სასტიკი დანაშაული აქვს ჩადენილი იტალიის, საფრანგეთის, გერმანიის, ავსტრიის, ესპანეთის, ჩეხეთისა და ლიტვის ტერიტორიებზე.

გამოცემა Fatto Cronaca-ს ცნობით, "ქუთაისელები", ფაქტობრივად, ღიად მოქმედებდნენ, ხოლო მერაბ ჯანგველაძეს მილანის ერთერთ გარეუბანში ოფისიც ჰქონდა გახსნილი.

რუსეთის შსს იუწყება, რომ "მერაბ სუხუმსკის" ასევე რამოდენიმე დანაშაული ჰქონდა ჩადენილი რუსეთისა და უკრაინის ტერიტორიაზე, მათ შორის გამორიცხული არაა, რომ იგი მონაწილეობდა "დედ ჰასანის" (ალან უსოიანის) მკვლელობაში.