კულტურისა და ძეგლთა დაცვის მინისტრი გურამ ოდიშარია დღეს ჩოხატაურს ეწვევა

საზოგადოება - 09:35, 17 Jul, 2013

519

კულტურის სამინისტროს ინფორმაციით, ისინი VI საერთაშორისო პოეზიის ფესტივალის "მთელი ხმით" მონაწილეებთან ერთად, ნოდარ დუმბაძის სახლ-მუზეუმს ესტუმრებიან, დაესწრებიან ჩოხატაურის მუნიციპალიტეტის კულტურის ცენტრთან არსებული ფოლკლორული ანსამბლის "ნართი" კონცერტსა და ამავე ცენტრთან არსებული სახალხო თეატრის იმპროვიზირებულ გამოსვლას.

VI საერთაშორისო პოეზიის ფესტივალის ფარგლებში დაგეგმილია ფესტივალის მონაწილეების მიერ, ჩოხატაურში მდებარე ნოდარ დუმბაძის სახელობის სკვერში, მწერლის ბიუსტის ყვავილებით შემკობა; ფესტივალის ფარგლებშივე გაიმართება საბავშვო ნახატების გამოფენა - "მე ვხედავ მზეს"; ასევე ნოდარ დუმბაძის საბავშვო რუსულ–ქართული გამოცემის "ლექსები ბავშვებს" პრეზენტაცია; ჩოხატაურის მუნიციპალიტეტის მოსწავლე - ახალგაზრდობის სახლთან არსებული ფოლკლორული ანსამბლების "ხასანბეგურა" და "ილეკრო"კონცერტები.

VI საერთაშორისო პოეტური ფესტივალი "სრული ხმით" 13-22 ივლისს საქართველოს რეგიონებში მიმდინარეობს და მასში მონაწილეობას იღებენ, როგორც ქართველი, ისე უცხოელი პოეტები. ფესტივალში ჩართულია 70-ზე მეტი პოეტი და მთარგმნელი აშშ-დან, კანადიდან, რუსეთიდან, დიდი ბრიტანეთიდან, გერმანიიდან, საფრანგეთიდან, უკრაინიდან, ყაზახეთიდან, სომხეთიდან და აზერბაიჯანიდან. უცხოელ კოლეგებს უმასპინძლებენ ცნობილი ქართველი ლიტერატორები.
ფესტივალი "სრული ხმით" ეძღვნება ნოდარ დუმბაძის დაბადებიდან 85-ე და ვლადიმერ მაიაკოვსკის დაბადებიან 120-ე წლისთავს.

ათი დღის განმავლობაში პოეტური მარათონი მოიცავს 17 ქალაქს - თბილისი, რუსთავი, გორი, ახალქალაქი, მარნეული, ფოთი, ბათუმი, ქობულეთი, ხელვაჩაური, ქედა, შუახევი, მარტვილი, ზუგდიდი, ჩოხატაური, ოზურგეთი, ბაღდათი და ქუთაისი.