ხელნაწერთა ეროვნულ ცენტრში დღეს საზაფხულო სკოლა გაიხსნება

საზოგადოება - 09:51, 16 Jul, 2013

569

ღონისძიების სხვა მხარდამჭერები არიან: ტურიზმის საინფორმაციო ცენტრი, კომპანია ,,პეპსი" და საქართველოს კულტურული მემკვიდრეობის დაცვის ეროვნული სააგენტო.
ქართველოლოგიის საერთაშორისო საზაფხულო სკოლის მიზანია: ქართველოლოგიური მეცნიერებების პოპულარიზაცია, ქართული კულტურის მნიშვნელოვანი მონაპოვრის - ქართული დამწერლობის საერთაშორისო ასპარეზზე გატანა, ქართული ხელნაწერი ტრადიციის, როგორც კულტურათაშორისი ურთიერთობების პროდუქტის, მრავალმხრივობის აქცენტირება, ქართველ და უცხოელ მეცნიერთა და სტუდენტთა სამომავლო თანამშრომლობისათვის საფუძვლის მომზადება, თანამშრომლობითი ურთიერთობების განვითარების ხელშეწყობა.

საზაფხულო სკოლა განკუთვნილია ქართული კულტურით, განსაკუთებით, ქართული დამწერლობით და ხელნაწერი მემკვიდრეობით დაინტერესებული უცხოელებისთვის.
საზაფხულო სკოლაში მონაწილეობას მიიღებს ათი უცხოელი სხვადასხვა ქვეყნიდან: ლიტვა, ბელგია, იტალია, ისრაელი, პოლონეთი, უნგრეთი, გერმანია, სომხეთი და თურქეთი.

საზაფხულო სკოლის სასწავლო გეგმა მოიცავს აკადემიურ და კულტურულ-საგანმანათლებლო პროგრამებს. აკადემიური პროგრამა ითვალისწინებს სალექციო კურსებს, პრაქტიკულ სამუშაოებსა და დავალებებს, სემინარებს. აკადემიურ სასწავლო კურსს წარუძღვებიან ქართველოლოგიის სფეროს ქართველი მეცნიერები. კულტურულ-საგანმანათლებლო პროგრამა მოიცავს თემასთან დაკავშირებულ გამოფენას და ექსკურსიებს.

პროგრამის ფარგლებში მრგვალი მაგიდის ფორმატში გაიმართება დისკუსიები, ასევე სკოლის მონაწილეები წარმოადგენენ სამეცნიერო-კვლევით ნამუშევრებს პრეზენტაციის სახით. სკოლის სასწავლო პროგრამა ითვალისწინებს მსმენელების შეფასების ორკომპონენტიან სისტემას და მსმენელთა მიერ პროგრამის შეფასებას. სკოლის დასრულების შემდეგ მონაწილეებს გადაეცემათ სერტიფიკატები.

ლექციები ძირითადად ხელნაწერთა ეროვნულ ცენტრში ჩატარდება, ასევე, თემატიკიდან გამომდინარე, ექსკურსიების ფარგლებში სხვადასხვა სამუზეუმო და საბიბლიოთეკო სივრცეში.
საზაფხულო სკოლა 25 ივლისს დასრულდება.