ამის შესახებ "ნიუპოსტს" კოალიციის ერთერთმა წევრმა უთხრა, რომელმაც ვინაობის დასახელება არ ისურვა.

წყაროს ცნობით, გიორგი მარგველაშვილის შტაბის, უშუალოდ პრეზიდენტობის კანდიდატის აქტივობის გაშუქება ლევან კობერიძის რებრენდინგის ფირმას გადააბარეს. ლევან კობერიძე "საზოგადოებრივი მაუწყებლის" საინფორმაციო სამსახურის უფროსის, ჟურნალისტ სოფო მოსიძის მეუღლეა. წყარო ასევე აცხადებს, რომ ლევან კობერიძის ფირმას არამარტო გიორგი მარგველაშვილის, არამედ კიდევ რამდენიმე უწყების პიარ-მიმართულების კონტროლი აქვს დავალებული.

შეგახსენებთ, რომ სოფო მოსიძე "საზოგადოებრივი მაუწყებლის" საინფორმაციო სამსახურის უფროსად მას შემდეგ დაინიშნა, რაც ყოფილი ხელმძღვანელი ხათუნა ბერძენიშვილი თანამდებობიდან გაათავისუფლეს.

"ნიუპოსტთან" საუბარში სოფო მოსიძემ უარყო მეუღლის კუთვნილი ფირმისთვის გიორგი მარგველაშვილის PR-ის გადაბარების ფაქტი: "არა, რა სისულელეა, რა შტაბის PR-ის უფროსად? ახლა გავარკვევ, საიდან გავრცელდა ეგ ინფორმაცია", - უთხრა "ნიუპოსტს" სოფო მოსიძემ.

ბრენდინგისა და მარკეტინგული კვლევების კომპანია "Branding.ge"-ს დირექტორმა ლევან კობერიძემ განათლება სტოკჰოლმის ბიზნეს სკოლაში, სტრატეგიული მარკეტინგის სპეციალობით მიიღო. კობერიძე საქართველოში მოაზროვნეთა კლუბის "რა? სად? როდის?" დამაარსებელია, პროფესიით კი ექიმი-გინეკოლოგია და საზოგადოებრივ საქმეთა ინსტიტუტში (GIPA) ლექციებს კითხულობს.

ლევან კობერიძისთვის საზოგადოებასთან ურთიერთობის სექტორის ჩაბარებას უარყოფენ გიორგი მარგველაშვილის შტაბში და "ქართულ ოცნებაში", სადაც აცხადებენ, რომ უახლოეს დღეებში, როცა გიორგი მარგველაშვილი გადადგება და ოფიციალურად ჩაებმება წინასაარჩევნო მარათონში, შტაბის შემადგენლობა გამოცხადდება და საზოგადოებისთვის მისი ყველა წევრის შესახებ ინფორმაცია გახდება ცნობილი.