სააკაშვილი წაყენებულ ბრალდებას ტყუილს, გავრცელებულ ჩანაწერებს კი გაყალბებულს უწოდებს

მსოფლიო - 17:37, 05 Dec, 2017

1965

მიხეილ სააკაშვილმა ტყუილი უწოდა უკრაინის გენერალური პროკურორის მხრიდან წამოსულ ბრალდებას იმასთან დაკავშირებით, რომ მას ბიზნესმენი კურჩენკო აფინანსებს. გავრცელებულ ჩანაწერებს კი გაყალბებულად აცხადებს. ამასთან დაკავშირებით განცხადება სააკაშვილის პარტიამ „ახალ ძალთა მოძრაობამ“ გამოაქვეყნა:

„გენერალური პროკურორის განცხადება - არის აშკარა ტყუილი და მიმართულია უკრაინაში საპროტესტო აქციის დისკრედიტაციისკენ. ხელისუფლების მოსალოდნელი ქმედებების შესახებ სააკაშვილს სარწმუნო წყაროებიდან მიაწოდეს ინფორმაცია და მან ის 29 ნოემბერს გამოაქვეყნა. წყაროების მიერ მოწოდებული ინფორმაცია სრულად დაადასტურა დღეს გენერალური პროკურატურის და უსაფრთხოების სამსახურის ქმედებებმა.“- აღნიშნულია განცხადებაში.

ასევე სააკაშვილის პარტიაში აცხადებენ, რომ ხელისუფლება სააკაშვილისგან ცდილობს „კრემლის აგენტის“ შექმნას და ამ მიზეზით დაპატიმრებას :

„კვირას იმპიჩმენტთან დაკავშირებით გამართული მრავალათასიანი მარშის საპასუხოდ ხელისუფლება შეტევაზე გადავიდა და აგრძლებს პოლიტიკურ რეპრესიებს მიხეილ სააკაშვილის და „ახალ ძალთა მოძრაობის“ მხარდამჭერების მისამართით.“- ნათქვამია პარტიის განცხადებაში.

შეგახსენებთ დღეს დილით მიხეილ სააკაშვილი უკრაინელმა სამართალდამცავებმა დააკავეს. უკრაინის უშიშროების სამსახურის ინფორმაციით, მიხეილ სააკაშვილს ბრალი სისხლის სამართლის კოდექსის 256-ე მუხლის პირველი ნაწილით აქვს წარდგენილი, რაც დანაშაულებრივი ჯგუფის წევრებთან თანამშრომლობას და მათი დანაშაულებრივი საქმიანობის ხელშეწყობა-დაფარვას ითვალისწინებს. რამდენიმე საათიანი საპროტესტო აქციის შემდეგ, სადაც სააკაშვილის მხარდამჭერები პოლიციას მისი საპატრულო მიკროვტობუსით გადაყვანის საშულებას არ აძლევდნენ, მხარდამჭერებმა მიხეილ სააკაშვილი მიკროავტობუსიდან ძალის გამოყენებით დაიხსნეს.