"პოროშენკო იანუკოვიჩის ფეხსაცმლის მწენდავი იყო" - სააკაშვილი რადასთან სიტყვით გამოვიდა

მსოფლიო - 17:38, 05 Dec, 2017

3031

უკრაინის ოპოზიციის ერთ-ერთი ლიდერი მიხეილ სააკაშვილი მხარდამჭერებთან ერთად უკრაინის პარლამენტის შენობასთან იმყოფება. სააკაშვილმა მოსახლეობას საღამოს, რადასთან მისვლისკენ მოუწოდა.

„თქვენ დღეს მიხსენით. თქვენ დღეს ჩემი სიცოცხლე გადაარჩინეთ და ახლა ის თქვენ და უკრაინას გეკუთვნით. მოდით უმაღლესი რადასთან მოედანზე. პირდაპირ სამსახურის შემდეგ. ვაიძულოთ მათ წავიდნენ მანამ სანამ ამის შანსი აქვთ.

მე ვმეთაურობდი პუტინის წინააღმდეგ არმიას. მე ჩამოვიყვანე აქ ის ქართველი ოფიცრები, რომლებიც პუტინის წინააღმდეგ იბრძოდნენ . ისინი კი ჩვენ პუტინისთვის მუშაობაში გვდებენ ბრალს" - განაცხადა სააკაშვილმა.

მისივე თქმით, პოროშენკო ვერასოდეს გახდება პუტინი და "პოროშენკო იანუკოვიჩის ფეხსაცმლის მწენდავი იყო."

შეგახსენებთ, მიხეილ სააკაშვილის საცხოვრებელ სახლთან დილიდან სპეცრაზმი იყო მობილიზებული. სააკაშვილი ჩხრეკისას სახლის სახურავზე ავიდა და ხალხსა და სპეცრაზმს სახურავიდან მიმართა. სააკაშვილი სპეცდანიშნულების რაზმმა საკუთარ სახლში დააკავა, თუმცა მისი გადაყვანა ვეღარ შეძლო, რადგან მისმა მხარდამჭერებმა, იმ მანქანის ბლოკირება მოახდინეს, რომელშიც სააკაშვილი იმყოფებოდა. მოგვიანებით, კი ის მიკროავტობუსიდანაც გაათავისუფლეს.
უკრაინის უშიშროების სამსახურის ინფორმაციით, მიხეილ სააკაშვილს ბრალი სისხლის სამართლის კოდექსის 256-ე მუხლის პირველი ნაწილით აქვს წარდგენილი, რაც დანაშაულებრივი ჯგუფის წევრებთან თანამშრომლობას და მათი დანაშაულებრივი საქმიანობის ხელშეწყობა-დაფარვას ითვალისწინებს. აღნუშნული მუხლი 3-დან 5 წლამდე თავისუფლების აღკვეთას ითვალისწინებს.