"გამარჯვებისთვის ვარ დაბადებული, ამათ ვუტირებთ ყოფას"- სააკაშვილის პირველი კომენტარი (ვიდეო)

მსოფლიო - 15:52, 05 Dec, 2017

12000

გათავისუფლების შემდეგ მიხეილ სააკაშვილმა პირველი კომენტარი გააკეთა. "რუსთავი 2"-თან სატელეფონო საუბრისას საქართველოს მესამე პრეზიდენტი ამბობს, რომ ის"გამარჯვებისთვისაა დაბადებული".

სააკაშვილი პირობას დებს, რომ ოლიგარქიულ რეჟიმს უკრაინასა და საქართველოში დაამთავრებს.

"ფარჩაკები ვერ მიხვდნენ, ვისთან აქვთ საქმე. მე ვარ გამარჯვებისთვის დაბადებული, ქართველ და უკრაინელ ხალხთან ერთად. ნახეთ უკრაინელებმა რა გმირობა ჩაიდინეს.

მინდა მადლობა ვუთხრა მხარდაჭერისთვის დედაჩემს, სანდრას, ნიკუშას. ვუტირებთ ყოფას ყველა ოლიგარქს, ხალხის მძარცველს და დამამცირებელს უკრაინასა და საქართველოში"- განაცხადა სააკაშვილმა "რუსთავი 2-თან" კომენტარში.

საქართველოს ექსპრეზიდენტს ხელზე ბორკილი ადევს და ადგილზე მყოფი აქტივისტების გარემოცვაში იმყოფება. ისინი რადასკენ მიემართებიან.

შეგახსენებთ, მიხეილ სააკაშვილის საცხოვრებელ სახლთან დილიდან სპეცრაზმი იყო მობილიზებული. სააკაშვილი ჩხრეკისას სახლის სახურავზე ავიდა და ხალხსა და სპეცრაზმს სახურავიდან მიმართა. სააკაშვილი სპეცდანიშნულების რაზმმა საკუთარ სახლში დააკავა, თუმცა მისი გადაყვანა ვეღარ შეძლო, რადგან მისმა მხარდამჭერებმა, იმ მანქანის ბლოკირება მოახდინეს, რომელშიც სააკაშვილი იმყოფებოდა. მოგვიანებით, კი ის მიკროავტობუსიდანაც გაათავისუფლეს.
უკრაინის უშიშროების სამსახურის ინფორმაციით, მიხეილ სააკაშვილს ბრალი სისხლის სამართლის კოდექსის 256-ე მუხლის პირველი ნაწილით აქვს წარდგენილი, რაც დანაშაულებრივი ჯგუფის წევრებთან თანამშრომლობას და მათი დანაშაულებრივი საქმიანობის ხელშეწყობა-დაფარვას ითვალისწინებს. აღნუშნული მუხლი 3-დან 5 წლამდე თავისუფლების აღკვეთას ითვალისწინებს.