გასული 200 წლის განმავლობაში პირველად, იაპონიის ომპერატორი გადადგება და ტახტს მემკვიდრეს დაუთმობს.

ქვეყნის პრემიერ-მინისტრის სინძო აბეს განცხადებით, იმპერატორი აკიჰიტო და ექსპერტთა სპეციალური საბჭო შეთანხმდა თარიღზე, როდის დატოვებს იმპერატორი ტახტს.

ეს 2019 წლის 30 აპრილს მოხდება, იმპერატორის ტიტულს კი მისი უფროსი შვილი, მემკვიდრე პრინცი ნარუჰიტო მიიღებს.

ახლა ნარუჰიტო 57 წლისაა, მოქმედი იმპერატორი, 83 წლის აკიჰიტო კი ტახტზე 1989 წელს , მამის გარდაცვალების შემდეგ ავიდა.

იაპონიის მოქმედი კანონმდებლობის თანახმად იმპერატორს ტიტული სიცოცხლის ბოლომდე უნდა ეკავოს, თუმცა გასულ წელს იმპერატორმა აკიჰიტომ სპეციალური მიმართვა გაავრცელა, სადაც მის ხალხს სთხოვა, რომ მოხუცებულობის გამო მისთვის დასვენების უფლება მიეცათ. იმპერატორ აკიჰიტოს გულზე ოპერაცია აქვს გაკეთებული, ასევე სიმსივნური დაავადებები აწუხებს.

აღსანიშნავია, რომ კანონი მხოლოდ აკიჰიტოს შემთხევაში იმოქმედებს და მის მომდევნო იმპერატორებს არ ექნებათ გადადგომის უფლება.