რუსეთის საგარეო საქმეთა მინისტრის სერგეი ლავროვის განცხადებით, ყირიმის რუსეთის შემადგენლობაში შესვლის საკითხი საბოლოოდ დახურულია. ამის შესახებ ლავროვმა იტალიურ გაზეთ Libero-სთან საუბრისას განაცხადა:

„ეს თემა ერთხელ და სამუდამოდ დახურულია. შეგახსენებთ, რომ საუბარია ყირიმის მოსახლეობის თავისუფალ და დემოკრატიულ ნებაზე, რომელმაც გააზრებული არჩევანი გააკეთა მშვიდობისა და კეთილდღეობის სასარგებლოდ.

თვითგამორკვევის განხორციელების ეს ფორმა ერთადერთი საშუალება იყო ხალხის მნიშვნელოვანი ინტერესების დასაცავად უკრაინაში ნაციონალურ-რადიკალური ელემენტების ღრეობის ფონზე. ცხადია, რეფერენდუმზე ყირიმის მოსახლეობის მიერ გამოხატულმა ნებამ მას თავიდან ააცილა სამოქალაქო ომის საშინელებები“, - დასძინა ლავროვმა.

ლავროვმა გამომცემასთან საუბრისას რუსეთისა და ამერიკის შეერთებული შტატების ურთიერთობაზეც ისაუბრა:

„ვაშინგტონის მხრიდან რაიმე სახის დადებით ნაბიჯებს არ ველით. ოკეანეს გადაღმა რუსოფობია მძვინვარებს, რის გამოც მსოფლიო და ორმხრივ ურთიერთობებში თანამშრომლობის პოტენციალი დიდწილად გამოუყენებელი რჩება. ყოველ შემთხვევაში, რუსეთში არასდროს განვიხილავთ აშშ-ს ანალოგიურ ჭრილში. პირიქით, ჩვენ ყოველთვის პატივის ვცემდით ამერიკელ ხალხს და მის მიღწევებს“, - განაცხადა სერგეი ლავროვმა.