თენგიზ გუნავას დაკავებასთან დაკავშირებით თბილისის საქალაქო სასამართლოში დამატებითი განმარტებები გაკეთდა:

"დღეს თბილისის საქალაქო სასამართლოში დასრულდა სისხლის სამართლის საქმის განხილვა ბრალდებულ თენგიზ გუნავას მიმართ. საქმის მასალების მიხედვით, თენგიზ გუნავას ბრალი ედებოდა სამსახურეობრივი უფლებამოსილების გადამეტების და სამსახურეობრივი მდგომარეობის გამოყენებით მითვისების ორ ეპიზოდში, ასევე ჯანმრთელობის მსუბუქი დაზიანების მიყენებაში.

ბრალდებული თენგიზ გუნავა სამსახურეობრივ უფლებამოსილების გადამეტების წარდგენილ ორივე ეპიზოდში და ჯანმრთელობის განზრახ მსუბუქ დაზიანებაში ცნობილი იქნა უდანაშაულოდ და გამართლდა.

თენგიზ გუნავა ცნობილი იქნა დამნაშავედ სამსახურეობრივი მდგომარეობის გამოყენებით მითვისების ორივე ეპიზოდში, კერძოდ 3 ათასი ლიტრი ბენზინისა და 49 500 ლარის მითვისებაში და საბოლოოდ სასჯელთა შთანთქმის და 2012 წლის დეკემბრის ამნისტიის შესახებ კანონის გამოყენებით, სასჯელის სახით 4 წლით თავისუფლების აღკვეთა შეეფარდა. მასვე 1 წლისა და 6 თვის ვადით ჩამოერთვა თანამდებობის დაკავების უფლება"

შეგახსენებთ, რომ თენგიზ გუნავას საქმის განხილვა დღეს, თბილისის საქალაქო სასამართლოში მიმდინარეობდა. განაჩენი შესაძლოა გასაჩივრდეს ერთი თვის ვადაში თბილისის სააპელაციო სასამართლოში.